اسلام آباد۔ 02 اگست (اے پی پی) بنجائی وزیر آبی وسیلہ سید خورشید احمد شاہ بھارت نا غیر کانودی کوزہ گیری ٹی جموںو کشمیر نا الس تون پبی یکجہتی نا درشانی ءِ کرسا پارینے کہ کشمیری تا برخلاف ظالمانہ گام گیج مذمت نا قابل ءِ، جہانی کہول آ دا جھیڑہ ءِ پبی وڑاٹ تالان کننگ و دنیا نا چکار ءِ دامان اٹی کشمیری الس آ کروک آ ظلم انا کنڈآ کرفنگ کن ہرفورم آ توار بڑز کرسا کینہ۔ 5 اگست آ اڈ تروک آ یوم استحصال نا بابت ’’اے پی پی‘‘ تون گپ وتران کرسا اوپارے کہ کشمیر نا ویل 75 سال آن ایسر مننگ کتو، جہانی کہول آ دا جھیڑہ ءِ پبی وڑاٹ تالان کننگ و دنیا نا چکار ءِ دامان اٹی کشمیری تیا کروک آ ظلم انا کنڈآ کرفنگ نا کوشست کننگ اُن، و نن آخیریکو دم اسکان دا کوشست آتے برجاتخنہ۔ اوپارے کہ ننا اسلامی و اخلاقی فرض مریک کہ نن مظلوم کشمیری تیکن دنیا ناہرفورم آ نئے بیرہ توار بڑز کین بلکن جہانی ضمیر ءِ سرفنگ نا ہرممکن حد اسکان کوشست کین۔ خورشید شاہ کشمیر نا جھیڑہ ءِ اقوام متحدہ نا قرارداد و کشمیری الس نا است خواہی تا رداٹ ایسر کننگ نا اہمیتءِ تالان کرسا پارے کہ معصوم کشمیری تیا بھارتی ظلم کاٹم آن گدرینگانے، اونا توننگ کن ننے انسانیت نا پن آ جہانی برادری نا ضمیر ءِ بیدار کننگ و جھیڑہ نا پائیدار و پرامن ایسری کن سخت کوشست کروئی مریک ، اوپارے کہ کشمیری تا گچین توار جوڑ مننگ کن ننے شہید ذوالفقار علی بھٹو و شہید گودی بے نظیر بھٹو کون آ طرز عمل اختیار کروئی مریک۔
