اسلام آباد ۔ 02 اگست (اے پی پی) پاکستان بھارت نا غیرکانودی کوزہ گیری ٹی جموں و کشمیر نا خصوصی حیثیت ءِ چٹفنگ نا غیرکانودی ، غیر اخلاقی و غیر آئینی گام گیج انا مذمت و بھارتی فوجی گھیڑ انا 3 سال پورو مننگ آ 5 اگست آ یوم استحصال اڈ ایتک۔ حکومت یوم استحصال نا وخت آ مظلوم کشمیری تتون یکجہتی نا درشانی ءِ کننگ کن سیمینار و کانفرنس آتون اوار چندی پروگرام تا بست وبند کرینے وخت اس کہ کشمیری تا مخ تفی ٹی مچ آملک اٹی ریلی کشنگک ہراٹی ہر تپہ فکر انا بندغ آک پبی بشخ ہلیرہ۔ مچ آ قوم تینا کشمیری ایلم تے دا کلہو ایتک کہ پاکستانی الس اوفتا حق خودارادیت نا انصاف اٹ جہد و بھارتی فوج انا ظلم انا برخلاف مدام اوفتے تون سلک۔ لائن آف کنٹرول نا ہڑتوم آ کنڈ و مچ آ دنیا ٹی رہینگوک کشمیری ہم 5 اگست 2019 نا بھارت نا غیر آئینی گام انا مذمت کن یوم استحصال اڈایتک ۔ ملک انا غٹ سیاسی جماعت آتا کارندہ ریلی و ایول سرجزآتا کمک اٹ کودک کشمیری تیا مروک آ بھارتی ریاستی دہشت گردی نا برخلاف برانز ریکارڈ کرفرہ۔ سول سوسائٹی نا تنظیمک کشمیری الس نا برخلاف انسانی حق انا بھلا خلا ف ورزی تے تالان کننگ کن سیمینار و ایلو پروگرام تا ہم بست وبند کیرہ۔ یوم استحصال نا وخت آ مچ آ ملک اٹی اسہ منٹ انا چپی اختیار کننگک، ٹریفک ءِ اسہ منٹ اکن توننگک و سائرن خلنگک۔ اسہ منٹ انا خاموشی آن دمدستی پد ریڈیو پاکستان و پاکستان ٹیلی ویژن تون اوار الیکٹرانک میڈیا چینل آتیا پاکستان و آزاد جموں و کشمیر نا قومی ترانہ ءِ خلنگک۔ داکان بیدس اسلام آباد و صوبائی دارالحکومت آتا اہم شاہراہ تیا کشمیری تا حالیت زار ءِ تالان کننگ و جموں و کشمیر اٹی کوزہ گیر فوج انا کنڈآن کروک آ ظلم ءِ تالان کننگ کن پوسٹر و بل بورڈز خلنگک۔ مودی نا کماشی ٹی بھارتیہ جنتا پارٹی نا حکومت 5 اگست 2019 آ بھارتی آئین نا آرٹیکل 370 و A35ءِ چٹفیسس، داکانود نا رداٹ کشمیر ءِ خاص حیثیت تننگاسس۔
