بلوچستان اٹی پِر تیان بھسکاری ءِ بیان کننگ مفک، زہمی تا آبادکاری اسکان آرام اٹ تولپنہ، وزیراعظم شہباز شریف

اسلام آباد۔ 02 اگست (اے پی پی) وزیراعظم محمد شہباز شریف پارینے کہ بلوچستان اٹی پدریسہ پِر و نوکاپ نا سوب آن مروک آ بھسکاری تے بیان کننگ مفک، زہمی تا آبادکاری اسکان آرام اٹ تولپنہ، مچ آ قوم زہمی ایڑھ ایلم تا کمک ءِ کننگ کن مون آ برے۔ سے شنبے نادے آ تینا ٹویٹ اٹی اوپارے کہ بلوچستان اٹی پدریسہ پِر و نوکاپ نا سوب آن مروک آ بھسکاری ءِ بیان کننگ مفک۔ حکومت نا غٹ ادارہ غاک گرج آتے مون آ تخسا ریسکیو و ریلیف نا کاریم ءِ ترند کرینو۔ نن ہمووخت اسکان آرام اٹ تولپنہ ہراتم اسکان زہمی تا  آبادکاری پورو مفک۔ وزیراعظم پارے کہ نن نوکاپ آن ودی مروک مشکل حالیت آتا مقابلہ ءِ کننگ کن چندی پڑتیا کاریم کننگ اُن۔ چیلنج ایہن تو بھاز بھلن ءِ ولے دا چیلنج اتون مون تننگ نا ننا عزم اوڑآن ہم سوگو ءِ۔ ای مچ آ قوم آن خواست کیوہ کہ او مون آ برے و تکلیف اٹی اختہ نناایڑھ و ایلم تا کمک ءِ کیر۔ ای ریسکیو و ریلیف آپریشن اٹی پبی کڑد ادا کننگ آ وزیراعلیٰ بلوچستان، صوبائی انتظامیہ، این ڈی ایم اے و پاکستان نا فوج انا خاص وڑاٹ منت وار اُٹ۔