وزیراعظم شہباز شریف نا آرمی چیف جنرل قمر جاوید باجوہ ءِ ٹیل فون ، آرمی ایوی ایشن نا بے گواہ ہیلی کیپٹر نا بابت تازہ معلومداری دوئی کرے

اسلام آباد۔ 02 اگست (اے پی پی) وزیراعظم شہباز شریف سے شنبے نادے آ آرمی چیف جنرل قمر جاوید باجوہ ءِ ٹیل فون کرے و آرمی ایوی ایشن نا بے گواہ مروک آ ہیلی کیپٹر نا بابت تازہ معلومداری دوئی کرے۔ سے شنبے نادے آ وزیراعظم آفس نا میڈیا ونگ آن جاری بیان نا رداٹ وزیراعظم 12 کور انا کمانڈر لیفٹیننٹ جنرل سرفراز علی تون اوار آرمی نا 6 آفیسر و ورناتا سلامتی نا بابت تینا گڑتی و فکرمندی نا درشانی ءِ کرے۔ وزیراعظم پارے کہ لیفٹیننٹ جنرل سرفراز علی اسہ گچین ءُ پروفیشنل و بھاز جوان ءِ انسان اسے۔ دعاکیوہ کہ ہیلی کیپٹر اٹی سوار غٹ مخلوق حفاظت اٹ مریر۔ وزیراعظم قوم آن خواست  کرے کہ وطن نا دا نرزور مارتا حفاظت اٹ پدی بننگ کن خصوصی دعا کیر۔ مچ آ قوم دا شکست آ بھاز افسردہ ءِ۔ وزیراعظم خراج تحسین پیش کرسا پارے کہ نوکاپ زدگان تا کمک ءِ کروک آ دا فرض شناس مارک خذمت نا بڑزکو درور اس جوڑ مرسا مون آ بسنو۔ دادے تینا ایڑھ ایلم ، چناتا خذمت نا ہمو عظیم جوزہ ہرا پاکستان نا حقی طاقت ءِ۔ آرمی چیف تدوک آ نن آن برجا پٹنگ نا کارروائی تا بابت وزیراعظم ءِ معلومدار کرے۔