عمران خان یک و نیم کروڑ روپئی ہمو ذریعہ غاتے اٹ دوئی کرے ہرانا پاکستان نا کانود موکل تفک، شاہد خاقان عباسی نا پریس کانفرنس

اسلام آباد۔ 02 اگست (اے پی پی) مسکوہی وزیراعظم و مسلم لیگ (ن) نا سینئر راہشون شاہد خاقان عباسی پارینے کہ الیکشن کمیشن نا فیصلہ غان پک مسنے کہ پی ٹی آئی غٹ آن بھلا دُز جماعت ءِ، عمران خان یک و نیم کروڑ روپئی ہمو ذریعہ غاتے اٹ دوئی کرے ہرانا پاکستان نا کانود موکل تفک، ایلوفتیا غداری نا دوبہ خلوک آک  ورندی ایتر کہ او بھارت و اسرائیل نا شاری تیان فنڈنگ ہلسا دِنا کاریم ءِ کریرہ۔ داخیال آتا درشانی ءِ او سے شنبے نادے آ پریس کانفرنس آن تران کرسا کرے۔ شاہد خاقان عباسی پارے کہ 8 سال مست پی ٹی آئی نا بانی راہشون اکبر ایس بابر دا کیس ءِ الیکشن کمیشن اٹی کریسس۔ دا 8 سال اسکان سماعت اٹی ئس۔ پی ٹی آئی دادے ہرے نا گواچی کننگ نا کوشست کرے۔ پی ٹی آئی ہچ ءُ ریکارڈ اس تتو ہرا ریکارڈ بس او ہم اسٹیٹ بینک و ایلو ادارہ غاتیان دوئی کرے۔ سکروٹنی کمیٹی نا رپورٹ نا رداٹ ہرا فیصلہ بس او غٹ انا مون آٹے۔ عمران خان نا سیاسی ہی ہندا ئسک کہ ایلوفک دُز ءُ۔ دا فیصلہ غان پک مس کہ غٹ آن بھلا دُز جماعت پی ٹی آئی ءِ۔ الیکشن کمیشن نا ریکارڈ نا رداٹ عمران خان یک و نیم کروڑ روپئی ہمو ذریعہ غاتے اٹ دوئی کرے ہرانا پاکستان نا کانود موکل تفک۔ داذریعہ غاتیٹی بھارت و اسرائیل نا شاریک ہم اوار ءُ۔ ایلوفتیا غداری نا دوبہ خلوک  آک دا ہیت آتا ورندی ءِ ایتر کہ او بھارت و اسرائیل نا شاری تیان فنڈنگ ہلسا دِناکاریم تے کرفیرہ۔ اوپارے کہ امریکہ ٹی فنڈنگ کن کمپنی جوڑ کننگا ہرا درملکی شاری و کمپنی تیان فنڈ ہلکرہ۔ 35 درملکی شاری و 351 درملکی کمپنی تیان فنڈ دوئی کننگا۔ ووٹن کرکٹ کلب ہرا کہ مین انا کمپنی ءِ اوڑآن 55 کروڑ روپئی پی ٹی آئی نا اکاؤنٹ اٹی امر بس حالانکہ دا زر پاکستان اٹ آسودہی کاریم تیکن تننگاسس۔ شاہد خاقان عباسی پارے کہ اسٹ تو دا پیدوار مس کہ یک و نیم سد کروڑ روپئی عمران خان درملکی کمپنی و شاری تیان ہلک۔ دا کانود نا اسُل خلاف ورزی ءِ۔ پی ٹی آئی نا پن آ 24 اکاؤنٹ پیش تما ہرافتیان 8 اکاؤنٹ ڈکلیئرڈ ءُ۔ 16 اکاؤنٹ آتے دا منتویرہ ہی اسُل، ہراتم جاست وپاست مس تو سما تما کہ اکاؤنٹ اس پی ٹی آئی نا گورنر، وزیر و اسپیکر چلیفنگ ءِ۔ دااکاؤنٹ آتیٹی زر بس۔ اوپارے کہ دابندغ آک منی لانڈرنگ کتورہ۔