پی ٹی آئی نا سروک الیکشن کمیشن اٹی دروغ انا حلف نامہ اس جمع کرفے، داسہ بنجائی حکومت فیصلہ کیک کہ ہراوڑمون آ ہنوئی ءِ، بنجائی وزیر بجلی خرم دستگیر خان نا پریس کانفرنس

اسلام آباد۔ 02 اگست (اے پی پی) بنجائی وزیر بجلی خرم دستگیر خان پارینے کہ ممنوعہ فنڈنگ کیس اٹ الیکشن کمیشن نا فیصلہ غان تینے صادق و امین گوندنگوک آ دروغ تڑ پک مسنے ، مسکوہی سلیکٹڈ وزیراعظم و پی ٹی آئی نا سروک الیکشن کمیشن اٹی دروغ انا حلف نامہ اس جمع کرفے، کانود نا رداٹ سیاسی جماعت آک درملکی کمپنی و شاری تیان فنڈ ہلنگ کپسہ، 2014 آن 2018 اسکان نا کھاتہ ملنگے تو پین بھاز گڑا مون آ بریک، داسہ بنجائی حکومت کانود نا رداٹ گام ہرفک ، سپریم کورٹ کن سیاسی کیس امتحان مریک، المی ءِ کہ داوڑنا باندات آتا سماعت ءِ فل کورٹ کے۔ سے شنبےنادے آ پریس انفارمیشن ڈیپارٹمنٹ اٹی سپریم کورٹ بار انا مسکوہی صدر و جے یو آئی ف نا راہشون سینیٹر کامران مرتضی تون اوار پریس کانفرنس آن تران کرسا پارے کہ پاکستان تحریک انصاف نا برخلاف ممنوعہ فنڈنگ نا کیس پی ٹی آئی نا اسہ سینئر راہشون اس دائر کریسس ہرا داہیت آ فریشان ئس کہ اوفتا چیئرمین ہراوڑ کانود ءِ لتاڑنگ ءِ و درو کننگ ءِ۔ 8 سال آن پد دا فیصلہ بسنے۔ 68 پنہ غاتیا تالان فیصلہ ٹی دا پک مسنے کہ عمران خان نئے تو مہالو صادق و امین ئس و نئے داسہ ءِ، اوڑآ مہر لگانے۔ اوپارے کہ پی ٹی آئی 2014 آن فتنہ، پھسات و فازم تالان کننگ ءِ۔ اودے پیشن آن زر ملاکہ حالانکہ ملک انا کانود موکل تفک  کہ سیاسی جماعت اس درملکی شاری یا کمپنی اسے آن فنڈ ہلے۔ اودے آسٹریلیا، یورپ و ایلو ملک آتیان فنڈنگ مسنے۔ پی ٹی آئی نا سروک و مسکوہی سلیکٹڈ وزیراعظم دروغ انا حلف نامہ اس جمع کرفے۔ صادق و امین نا دعویٰ کروک آ نا سوغند دروغ پیش تما۔