سرینگر۔ 02 اگست (اے پی پی) نئی دہلی نا بدنام زمانہ تہاڑ زندان اٹی غیرکانودی وڑاٹ نظر بند جموں وکشمیر لبریشن فرنٹ نا چیئرمین محمد یاسین ملک 10 دے آن برجا بین ہڑتال ءِ چٹفینے۔ اوبین ہڑتال ءِ تعلقدار کمامدار آتے اونا خواست آتیان معلومدار کننگ آن پد چٹفے۔ کشمیر میڈیا سروس نا رداٹ 56 سال انا ناجوڑ راہشون یاسین ملک 22 جولائی آ روبیہ سعید نا برمتہ نا دروغ انا دوبہ نا انصاف اٹ سماعت و اودے ذاتی وڑاٹ جموں نا عدالت اٹ پیش مننگ نا حق آن محروم تخنگ نا برخلاف غیر معینہ مد اسکان بین ہڑتال نا بناءِ کریسس۔ پریس ٹرسٹ آف انڈیا زندان کمامدار آتا بابت پارے کہ دلی نا امور جیل خانہ جات نا ڈائریکٹر جنرل سندیپ گوئل نا درخواست آ یاسین ملک تینا بین ہڑتال ءِ 2 تُو اکن پد بٹینے۔ یاسین ملک اسہ دروغ انا مقدمہ سے ٹی عمر قید نا سزا ءِ کاٹ کننگ ءِ۔ زندان نا اسہ سینئر کارندہ اس پارے کہ ڈی جی یاسین ملک ءِ پارے کہ اونا غٹ خواست آتے تعلقدار کمامدار آتسکان سرکننگانے و اودے دا بارواٹ فیصلہ غان معلومدار کننگک۔ سندیپ گوئل اوڑآن تینا بین ہڑتال ءِ چٹفنگ نا خواست ہم کریسس، اوکان پد او تینا بین ہڑتال ءِ چٹفے۔ یاسین ملک ءِ بلڈپریشر اٹی شیف و بڑزی آن پد تدوک آ ہفتہ نئی دہلی نا آرایم ایل ہسپتال اٹ داخل کرفنگاسس و زندان آ پدی بننگ آن پد او دُوارہ گڑا کننگ آن انکار کریسس۔ کمامدار آتا رداٹ یاسین ملک ہرادے بھارت نا بدنام زمانہ تہاڑ زندان نا اسہ ہائی رسک سیل اسے ٹی بند تنیائی ٹی تخنگانے، ءِ زندان نا میڈیکل انوسٹی گیشن روم اٹ گدریفسا آئی وی فلوئیڈز تننگاسس۔ یاسین ملک ہسپتال نا ڈاکٹر آتا پن اسہ چٹھی اسے ٹی پاریسس کہ او درمان کرفنگ خواپک۔
