وزیراعظم شہباز شریف نوکاپ زدہ علاقہ غاتا دورہ کن کوئٹہ غا سرمس، بنجائی وزیر حوالکاری مریم اورنگزیب نا ٹویٹ

اسلام آباد۔ 01 اگست (اے پی پی) وزیراعظم شہباز شریف خشنوب، ضلع قلعہ سیف اللہ ٹی نوکاپ زہمی تیکن جوڑ کروک خیمہ بستی چمن و نوکاپ زدہ علاقہ غاتا دورہ ءِ کننگ کن کوئٹہ غا سرمسنے۔ بنجائی وزیر حوالکاری مریم اورنگزیب دوشنبے نادے آ تینا ٹویٹ اٹی پارے کہ وزیراعظم ءِ کسر اٹی این ڈی ایم اے نا چیئرمین ریسکیو ریلیف و کمکی کارروائی تیا حوال تس۔ تینا اسہ پین ٹویٹ اسے ٹی بنجائی وزیر حوالکاری پارے کہ وزیراعظم تینا دورہ ٹی بلوچستان نا نوکاپ زدہ علاقہ غاتیٹی کمکی کارروائی تا جاچ و زہمی تتون اوڑدہی کیک۔ وزیراعظم خشنوب، ضلع قلعہ سیف اللہ ٹی نوکاپ زہمی تیکن جوڑ کروک خیمہ بستی و چمن اٹی نوکاپ زدہ علاقہ غاتا دورہ ءِ کیک و ہندی مخلوق تون اوڑدہی ہم کیک۔