کوئٹہ۔ 01 اگست (اے پی پی) وزیراعظم شہباز شریف بلوچستان اٹی پِر ونوکاپ آن زوال کروک آتا وارث آتے معاوضہ 24 گھنٹہ ٹی تننگ نا پارت کرسا پارینے کہ ساڑی چیلنج بھاز بھلن ءِ، زہمی تا پورو بحالی اسکان آرام اٹ تولپنہ۔ اوداخیال آتا درشانی ءِ دوشنبے نادے آ داڑے کوئٹہ غا بننگ آ پِر و نوکاپ آن مروک آ نسخان تا بابت حوال اٹی کرے۔ بنجائی وزیر حوالکاری و شینکاری مریم اورنگزیب ، بنجائی وزیر ہاؤسنگ مولانا عبدالواسع، بنجائی وزیر دفاعی پیداوار اسرار ترین و بنجائی وزیر انسداد منشیات نوابزادہ شاہ زین بگٹی ، وزیر مملکت بجلی میر ہاشم نوتیزئی، قومی اسمبلی نا باسک صلاح الدین ایوبی و چیئرمین این ڈی ایم اے لیفٹیننٹ جنرل اختر نواز ئسک ہم داوخت آ ساڑی ئسر۔ کوئٹہ غا سرمننگ آ وزیراعظم ءِ چیف سیکرٹری بلوچستان عبدالعزیز عقیلی و چیئرمین این ڈی ایم اے لیفٹیننٹ جنرل اختر نواز بلوچستان اٹی ساڑی آ پِر تا نسخان و کمکی سرجزآتا بابت سرجم حوال تسر، وزیراعظم این ڈی ایم اے ءِ بلوچستان اٹی پِر و نوکاپ اٹی زوال کروک آتا وارث آتے معاوضہ نا زر 24 گھنٹہ ٹی تننگ و جزوی و پورو بھس مروک آ کچہ و پکا ہند آتا معاوضہ ءِ ہم اسہ وڑ کرسا و ودفسا پنچ لکھ روپئی کننگ نا پارت کرے۔ وزیراعظم پارے کہ ننا قومی المیہ ءِ کہ ڈیم تا وخت آ تفنگ آ چکار کننگتو۔ ساڑی چیلنج بھاز بھلن ءِ ولے نن زہمی تا پورو بحالی اسکان آرام اٹ تولپنہ۔ اومستی پارے کہ بحالی و امداد کن این ڈی ایم اے، صوبائی انتظامیہ و این ایچ اے نا کوشست ستاکڑزک۔ وزیراعظم پارت کرے کہ نوکاپ زہمی علاقہ غاتیٹی میڈیکل کیمپ آتا جال ءِ تالان کننگے۔ وزیراعظم پارے کہ بھلا پِر تیان بھلو کچ اسے آ نسخان مس ۔ نہادی انسانی جان تا نسخان آتون انفراسٹرکچر بھس مس۔ بنجا و بلوچستان حکومت قومی جوزہ اٹ بحالی و آبادکاری کن سنبرینگوک ءُ۔ ہراتم اسکان آخیریکو اُرا آباد مفک حکومت آرام اٹ تولپک۔ وزیراعظم ہندی و جہانی تنظیم تیان ہم نوکاپ زہمی تا کمک کن حکومت نا کمکاری نا خواست کرے۔ چیف سیکرٹری بلوچستان عبدالعزیز عقیلی و چیئرمین این ڈی ایم اے لیفٹیننٹ جنرل اختر نواز حوال اٹی سرجم آتے پارسا پاریر کہ 13 جون آ پِر تا پری بشامی چرجوئی بناکرے۔ سی سال انا اوسط انا مقابلہ ٹی بلوچستان اٹی کم و ود 500 درسد زیات پِر مس۔ حوال اٹی مستی پاننگاکہ داتم اسکان بلوچستان اٹی مرک آتا کل کچ 136 ءِ وخت اس کہ 70 بندغ ٹھپی ءُ۔ یانزدہ سد مخلوق زرس ٹھپی مس ہرافتے فرسٹ ایڈتننگا۔ 2 لکھ ایکڑ کشاری ڈغار ءِ دیرہرفے۔ 20 ہزار 500 مخلوق ءِ رکھ ہند آتیا گدریفنگا۔ موٹروے ایم 8 و کوئٹہ کراچی قومی شاہراہ بھلو حد اسسکان بحال کننگانے۔ وزیراعظم محمد شہباز شریف نا بلوچستان دورہ غا لاہور آن کوئٹہ غا سرمننگ آ بالی پٹ آ وزیراعلیٰ بلوچستان میر عبدالقدوس بزنجو اودے بخیر کرے وخت اس کہ صوبائی وزیر آک و بڑزکو کمامدار آک ہم اوڑتون اوار ساڑی ئسر۔
