قلعہ سیف اللہ۔ 01 اگست (اے پی پی) وزیراعظم شہباز شریف پارت کرینے کہ طوفانی پِر و نوکاپ آن مروک آ نسخان تا کساس ءِ خلنگ کن این ڈی ایم اے و پی ڈی ایم اے اواری اٹ سروے کیر، زہمی تے ہنکین، خور و درمان نا غٹ تر آسراتی فراوان کننگے۔ اوداپارت ءِ دوشنبے نادے آ داڑے خشنوب خیمہ بستی نا دورہ نا وخت آ کرے۔ داوخت آ وزیراعلیٰ بلوچستان میر عبدالقدوس بزنجو ، بنجائی وزیر ہاؤسنگ مولانا عبدالواسع ، بنجائی وزیر حوالکاری و شینکاری مریم اورنگزیب ، بنجائی وزیر انسداد منشیات شاہ زین بگٹی ، بنجائی وزیر دفاعی پیدوار اسرار ترین، وزیر مملکت توانائی محمد ہاشم نوتیزئی و قومی اسمبلی نا باسک صلاح الدین ایوبی ئسک ہم وزیراعظم تون اوار ئسر۔ وزیراعظم ءِ این ڈی ایم اے و پی ڈی ایم اے نا کمامدارآک طوفانی پِر و نوکاپ آن فصل،باغ، سڑک و چنکا ڈیم تے مروک آ نسخان ، ریسکیو وکمکی سرجزآتا بابت حوال تسر۔ وزیراعظم ءِ پاننگاکہ لسبیلہ، کیچ، کوئٹہ، ہرنائی، قلعہ سیف اللہ و ایلو ضلع غاتیٹی پِر و نوکاپ آن باغ ، فصل و ہند آتے نسخان رسینگانے۔ وزیراعظم ءِ پاننگاکہ ژوب ڈویژن اٹی مخلوق نا زیا ت تر ذریعہ معاش کشت وکشار و ساہدار توننگ نا ءِ۔ ہموڑے ہم بھاز نسخان مسنے۔ کم و ود 10 ہزار ڈیم و بند آتے نسخان رسینگانے۔ صوبہ نا غٹ ضلع غاتیان مروک آ نسخان تا حساب وکتاب ءِ یکجا کننگ انگ ءِ ہرافتا بنداو آ بحالی نا سرجزآتے مون آ دننگک۔ ناجوڑی تا توننگ و ناجوڑ آتا درمان کن میڈیکل کیمپ ہم خلنگانے ہراڑے مخلوق ءِ درمان نا گچین آسراتی تا فراوانی ءِ پک کننگانے۔ داکان بیدس ویٹرنری ہسپتال آتا ہم بست وبند کننگانے۔ مخلوق اسکان کنوئی آ گڑا و ایلو المی آ گڑاتے سرکننگ کن گام گیج کننگ انگ ءِ۔ وزیراعظم این ڈی ایم اے و پی ڈی ایم اے نا کمامدار آتیان نسخان و کمکی کارروائی تیا معلومداری دوئی کرے۔ تعلقدار محکمہ غاتا آفیسر آک تینا تینا محکمہ غاتا کنڈآن زہمی تا کمک کن کروک آ گام گیج آتیان معلومدار کریر۔ وزیراعظم ءِ پاننگاکہ ریسکیو و کمکی سرجز آتیٹی پاک فوج و ایف سی نا کارندہ غاک پبی کمک کرینو۔ وزیراعظم پارت کرے کہ زہمی تا ہروڑاٹ دادرسی ءِ کننگے و اوفتے ہنکین، خور و ایلو آسراتی دمدستی سرکننگے۔ وزیراعظم خیمہ بستی ٹی جوڑ میڈیکل کیمپ انا ہم دورہ ءِ کرے و ہموڑے مخلوق آن درمان نا آسراتی تا فراوانی نا بابت اَریفے۔
