راولپنڈی۔ 01 اگست (اے پی پی) پاک فوج انا سروک جنرل قمر جاوید باجوہ پیپلزلبریشن آرمی چیف نا جوڑ مننگ نا 95 می سال دے آ مبارکبادی پیش کرسا پارینے کہ پاک چین تعلقداری یکتا و سوگو ءِ، ہڑتوم آ ملک آک سرسہبی اٹ ہر چیلنج اتون مون تسر ۔ آئی ایس پی آر نا رداٹ چینی پیپلز لبریشن آرمی (پی ایل اے) نا قیام نا 95 می سال دے آ جی ایچ کیو راولپنڈی ٹی دود اس اڈ ہلک ہرانا مہمان خاص پاک فوج انا سروک جنرل قمر جاوید باجوہ ئسک۔ پاکستان اٹ چین نا سفیر نونگ رونگ، چینی سفارت خانہ نا کمامدار آک و پاکستان نا ہر مسٹ آ سلہہ بند فوج انا آفیسر آک دود اٹی بشخ ہلکر۔ داوخت آ تران کرسا چین نا سفیر پیپلزلبریشن آرمی نا 95 می سال دے انا وخت آ خصوصی دود انا اڈتننگ آ آرمی چیف جنرل قمر جاوید باجوہ نا منت واری ءِ ہرفے۔ چینی سفیر پارے کہ چین و پاکستان آئرن برادرز، آل ویدر فرینڈز و سٹریٹجک پارٹنر ءُ۔ چینی سفیر پارے کہ چین اٹی اڈ ہلوک اسیجائی کمکار کمیٹی فوجی کمکاری کن اسہ اہم ءُ پلیٹ فارم اس جوڑ کرینے ہرا ہڑتوم آ ملک آتا نیام اٹ ملٹری ٹو ملٹری تعلقداری کن گچین وڑاٹ کاریم کیک۔ پاک فوج انا سروک جنرل قمر جاوید باجوہ چین نا دفاع، سلامتی و قوم انا شونداری و شونہالی ٹی پیپلزلبریشن آرمی چین نا کڑد انا ستاءِ کرے۔ ہڑتوم آ ملک آک، فوج و الس نا نیام اٹ تعلقداری تا چندی پلو آتے تالان کرسا آرمی چیف جنرل قمر جاوید باجوہ پارے کہ پاک چین تعلقداری یکتا و سوگو ءِ۔ اوپارے کہ پیپلزلبریشن آرمی و پاک فوج اسہ ایلو تون کڑمب تعلقداری ءِ، ننا تعلقداری ننا اجتماعی فائدہ غاتا رکھ اٹی تینا کڑد ءِ ادا کرسا کیک۔
