اسلام آباد۔ 01 اگست (اے پی پی) پاک فضائیہ بلوچستان نا نوکاپ آن زہمی علاقہ غاتیٹی کمکی سرجزآتیٹی زیات آن زیات بشخ ہلنگ ءِ، آپریشن تیٹی پاک فضائیہ نا ہیلی کیپٹر آک 16،995 پاؤنڈآن زیات کمکی گڑا نوکاپ آن زہمی علاقہ غاتسکان سرکریر ہرافتا ڈغاری رابطہ ترند پِر و ساڑی آ نوکاپ نا سوب آن کشکنگاسس۔ ترجمان پاک فضائیہ نا رداٹ ہیلی کیپٹر آتا کمک اٹ دروک آ کمکی گڑاتیٹی نُت، سی، بورہ ، دال ، چاہ و جان بچفوک آ دوائیک اوار ءُ۔ مچ آ ملک اٹی نامساعد موسمی حالیت آتیان پد ہم نوکاپ زدہ علاقہ غاتیٹی پاک فضائیہ نا کارندہ غاک زہمی بندغ آتے انسانی ہمدردی نا بنداو آ امداد فراوان کننگ کن سخت جہد کننگ ءُ۔ سروک پاک فضائیہ ایئر چیف مارشل ظہیر احمد بابر سدھو پاک فضائیہ نا تعلقدار بشخ آتے بلوچستان نا نوکاپ زدہ علاقہ غاتیٹی کمکی سرجزآتیکن ہرممکن کمک فراوان کننگ نا پارت کرینے۔
