کل جماعتی حریت کانفرنس نا کنڈآن 5 اگست ءِ یوم استحصال نا وڑاٹ اڈتننگ نا خواست

سرینگر۔ 01 اگست (اے پی پی) بھارت نا غیر کانودی کوزہ گیری ٹی جموں وکشمیر اٹی کل جماعتی حریت کانفرنس 5 اگست آ یوم استحصال نا وخت آ پورو ہڑتال، سول کرفیو و بھلو کچ اسے آ برانزی مچی تا کال انا درشانی ءِ کرسا کشمیری الس آن تحریک آجوئی نا سرسہبی کن خصوصی دعا کننگ نا خواست کرینے۔ کشمیر میڈیا سروس نا رداٹ کل جماعتی حریت کانفرنس نا نظربند وائس چیئرمین غلام احمد گلزار سینٹرل جیل سرینگر آن تینا اسہ خاص ءُ کلہو اسے ٹی پارے کہ 5 اگست پوسکن آ کشمیر نا تاریخ نا غٹ آن است ہسون، دردناک، و تہار دے ءِ و کشمیریک اودے مدام یوم استحصال ، یوم سوگ و تہار دے انا وڑاٹ اڈ ایترہ۔ اوپارے کہ دا 5 اگست 2019 نا دے ئسک ہراتم انسانیت نا خونی نریندرمودی نا کماشی ٹی آر ایس ایس نا مخ تفوک فسطائی حکومت کشمیری تا سیاسی، راجی، مذہبی و ایلو غٹ بنداوی حق آتے غصب کرے ومقبوضہ جموں و کشمیر ءِ اسہ بھلو زندان اسے ٹی بدل کرے۔ او5 اگست نا گام گیج آتے ہندو توا واکدار تا کنڈآن کشمیر نا یکتا شناخت، دودوربیدگ، آبادی و بنداوی  حق آتیا جلہو گوندا۔