اسلام آباد۔ کل جماعتی حریت کانفرنس نا جنرل سیکرٹری شیخ عبدالمتین پارینے کہ 5 اگست 2019 نا اسہ کنڈی و غیر کانودی بھارتی گام گیج آتا برخلاف توار بڑز کرسا پاکستان و کشمیر نا الس دادے ءِ یوم استحصال نا وڑاٹ اڈایترہ، بھارت 5 اگست نا غیرکانودی و اسہ کنڈی گام گیج آتیان پد مقبوضہ کشمیر اٹی مسلمان تا آبادی نا کچ ءِ ترندی اٹ بدل کننگ ءِ، دا مسخت کن مقبوضہ علاقہ ٹی بھارتی کانود نا اطلاق ہم کننگانے۔ دوشنبےنادے آ ’’اے پی پی‘‘ تون گپ وتران کرسا اوپارے کہ بھارت اسہ ڈٹ اسے نا رداٹ کشمیری تا نسل کشی ءِکننگ ءِ، مودی نا کماشی ٹی بھارتی انتہاپسند آک ڈیہہ نا امن ءِ گہیو تخانو۔ اوپارے کہ کشمیر آ 75 سال آن برجا غیر کانودی بھارتی کوزہ و بھارتی کوزہ گیر فوج انا بے کچ بربریت کشمیری تا جوزہ حریت ءِ پست کننگ اٹ سرسہب مننگ کتنے، اقوام متحدہ کشمیر نا بارواٹ پاش مروک قرارداد آتیا عملدرآمد کرفے۔ اوپارے کہ کشمیری الس و اوفتا سنبرینگوک آ سرکڑدہ حق خودارادیت نا دوئی کننگ نا جہد اٹی لگوک ءُ و او بھارت نا غیر کانودی کوزہ گیری ٹی جموںو کشمیر نا آجوئی کن ہروڑنا قربانی ایترہ۔ اوپارے کہ بھارت 5 اگست 2019 نا غیرکانودی و اسہ کنڈی گام گیج آتے پدی ہلے و مقبوضہ علاقہ نا آبادیاتی پنجر ءِ بدل کننگ کن تینا غیرکانودی گام گیج آتے تورے۔ شیخ عبدالمتین پارے کہ بھارت مقبوضہ کشمیر اٹی انسانی حق آتے بھاز لتاڑنگ ءِ، کشمیری الس بھارت نا ریاستی دہشت گردی آن پد ہم حق خودارادیت کن تینا تحریک ءِ برجاتخرہ۔ 5 اگست آ جہانی برادری ءِ دا یات دہانی کرفنہ کہ کشمیری اسہ متنازعہ ڈیہہ اسے ہراڑ آبھارت غٹ جہانی کانود آتے گوجالاوجھیڑہ ئی ڈیہہ نا الس نا است خواہی تیان چپ کوزہ کرینے۔
