اسلام آباد۔ 01 اگست (اے پی پی) کل جماعتی حریت کانفرنس آزاد کشمیر و پاکستان شاخ نا سیکرٹری حوالکاری امیتاز وانی پارینے کہ بھارت مقبوضہ جموں و کشمیر ءِ فوجی چھاؤنی ٹی بدل کرینے، پن انا جمہوریت و سیکولررازم نا دعویدار بھارت نا فوج مقبوضہ کشمیر اٹی انسانی حق انا بھلو کچ اسے آ لتاڑتیٹی اوار ءِ۔ دوشنبے نادے آ اسلام آباد اٹی جاری بیان اوپارے کہ بھارت مقبوضہ جموں و کشمیر اٹی انسانی حق انا پاش آن پاش خلاف ورزی ءِ کننگ ءِ، بھارتی فوج ہڑدے کودک شاری تا خون و ملکیت و ہند آتے تباہ و برباد کننگ ءِ، بھارتی فوجیک ریاستی دہشت گردی نا برجا کارروائی تے برجاتخانو۔ اوپارے کہ کشمیری الس بھارت نا غیرکانودی کوزہ گیری و 5 اگست 2019 نا غیر کانودی و اسہ کنڈی گام گیج ءِ یکسر مستردکرسا تینا غم و غسہ نا درشانی ءِ کننگ کن حق آ مبنی تحریک ءِ برجاتخانے، کوزہ گیر انتظامیہ کشمیری حریت سرکڑدہ غاتے اُرا و زندان تیٹی پدریسہ نظر بند کرینے وخت اس کہ بھارتی فورس آک پبلک سیفٹی ایکٹ تون اوار ومون آ کانود نا رداٹ ہزار آ کشمیری ہرافتے ٹی گیشتر ورناءُ ءِ بندی کرینے۔ اوپارے کہ دزگیر کروک آ کشمیری تیٹی 15 سال انا وئی نا چناتتون اوار ورناتا اسہ بھلو کچ اس ساڑی ءِ۔ حریت کانفرنس نا راہشون پارے کہ درندہ صفت بھارتی فوج کودک کشمیری ورناتے لمہ و باوہ غاتا مون آ بدترین ظلم و بیدادی نا شست کننگ آن پد بے گواہ کیک۔ اوپارے کہ طاقت نا زور آ اسہ قوم اسے ہم زیات ہرے اسکان محکوم تخنگ مفک۔ امتیاز وانی پارے کہ بھارتی حکومت ہندو انتہاپسند تنظیم راشٹریہ سوائم سیوک سنگھ انا فسطائی ایجنڈاآ عمل کروک کشمیری الس ءِ غٹ بنداوی حق آن محروم کننگ ءِ۔ اوجہانی برادری آ زور شاغا کہ او مقبوضہ کشمیر اٹی بھلو کچ اسے آ برجا ظلم و بیدادی و بھارتی کوزہ گیری ءِ چٹفنگ کن تینا کڑد ءِ ادا کے۔
