کوئٹہ۔ 01 اگست (اے پی پی) قائمقام اسپیکر بلوچستان اسمبلی سردار بابر خان موسیٰ خیل پارینے کہ جنت نظیر کشمیر ءِ مودی سرکار خاخر و دتر نا مین اٹ دِکہ تسنے۔ کشمیری تا جہد آجوئی نا تحریک ضرور تینا ایسر اسکان سرمریک و کشمیر نا آجوئی نا دے دے ٹک ایتک۔ داخیال آتا درشانی ءِ او تدوک آ دے ’’اے پی پی‘‘ تون گپ وتران کرسا کرے، قائم مقام اسپیکر بلوچستان اسمبلی سردار بابر خان موسیٰ خیل پارے کہ بلوچستان نا حکومت ، سیاسی پارٹی، انجمن تاجران تون اوار غٹ تپہ غاتا مخلوق کشمیری تا جہد آجوئی نا تحریک نا سیاسی، سفارتی و اخلاقی کمک ءِ برجاتخرہ۔ اوپارے کہ مودی نا فاشٹ حکومت کشمیری تیا ظلم و ستم کننگ ءِ واوفتے اوفتا گل زمین آن بے دخل کننگ کن صیہونی وڑنا آبادکاری کننگ انگ ءِ وخت اس کہ کشمیر نا غٹ سیاسی راہشون تے قدغن مون تروک ءِ۔ میڈیا غا بدترین جور انا سیخا ءِ۔ سردار بابرخان موسیٰ خیل پارے کہ کشمیری تے حق خودارادیت آن محروم کرسا اوفتیا ریاستی جور کننگ ساڑی آ دور اٹی ریاستی دہشت گردی نا اسہ بدترین ءُ درور اسے۔ 5 اگست آ یوم استحصال کشمیر نا وخت آ بلوچستان نا غٹ تپہ غاتا مخلوق کشمیری ایلم تتون سلرہ و مودی نا انسانیت کش پالیسی تا برخلاف سراپا برانز کیرہ۔
