اسلام آباد۔ 29 جولائی (اے پی پی) قومی اسمبلی ءِ پاننگانے کہ ادارہ جاتی اسپورٹس نا بحالی نا سلاہ غا سجفنگ انگ ءِ ، ملک اٹی ہاکی نا عظمت رفتہ نا بحالی کن گام گیج المی ءِ۔ جمعہ نادے آ قومی اسمبلی نا وقفہ سوج آتیٹی مولانا عبدالاکبر چترالی نا سوج آ مرتضیٰ جاوید عباسی پارے کہ اسپورٹس فیڈریشن نا مینجمنٹ نا تقرری نا اسہ وڑوڈول اس ارے۔ ہاکی نا تنزلی نا سو ب و ہاکی فیڈریشن نا بابت امور نا جاچ ءِ ہلنگ المی ءِ۔ اوپارے کہ ہاکی ٹی تنزلی مسنے، المی ءِ کہ صوبائی، ڈویژن و تحصیل نا کہول آ دابابت گام گیج مرے۔ داوخت آ ہالی ٹی پاکستان ہژدہ می و بھارت چارمیکو نمبر آٹے۔ ہاکی فیڈریشن نا اول سرآن تنظیم بایدے مرے۔ اسکواش و ہاکی ٹی پاکستان مستین اٹ دنیا نا کماشی ءِ کرینے۔ دا گوازی تیٹی دُوارہ گچین ءُ ہند اسے کن کاریم کننگ نا گرج ءِ۔ ڈاکٹر شازیہ صوبیہ اسلم نا سوج آ وزیر مملکت پارے کہ دولت مشترکہ گیمز اٹی قومی ہاکی ٹیم نا وائس کیپٹن ہنداخاطرآن بشخ ہلنگ آن معذرت کرے کہ اگہ او ہنا تو اونا اُرانا خڑچہ ءِ دیر سگک، دااسہ فکرانا ہیت اسے۔ تدوک آ حکومت ڈیپارٹمنٹل اسپورٹس ءِ چٹفیسس، ولے اکیڈمی ہم جوڑ کننگتو۔ داوخت آ اسپورٹس اٹی ننا ٹیلنٹ پیشن ہِننگ ءِ۔ ڈیپارٹمنٹس سپورٹس نا بحالی نا سلاہ غا سجفنگ انگ ءِ۔ نواب شیر وسیر پارے کہ ہاکی ننا قومی گوازی ئسک و نن اوٹی دنیا ٹی پن کٹاسن، دا گوازی بھس مسنے۔ صدر ویل چیئر آ تولک، نن کمیٹی ءِ پِرغنگ و پوسکن ءُ کمیٹی جوڑ کننگ نا سلاہ کریسن ولے کمیٹی ٹی داصدر ءِ دُوارہ صدر پن کننگانے۔ مرتضیٰ جاوید عباسی پارے کہ فیڈریشن نا صدر نا تقرری نا کمیٹی تون ہچ ءُ تعلق اس اف۔ نواب شیر وسیر پارے کہ اونا خواست ءِ کہ پوسکن ءُ کمیٹی اس جوڑ کننگے۔ اسپیکر پارے کہ تعلقدار وزیراف، ہراتم احسان اللہ ایوان اٹ مریک تو دا باندات ءِ دُوارہ ہرفنگک۔ اوسوج ءِ دُوارہ ایجنڈاغا اتنگ نا پارت کرے۔
