کوئٹہ۔ 29 جولائی (اے پی پی)ایڈمنسٹریٹر لوکل گورنمنٹ کوئٹہ عصمت اللہ بازئی پارینے کہ ساڑی آ بشام نا پِر تیٹی دیر انا کشنگ و سفائی نا حالیت آتے گچین کننگ کن غٹ دوئی وسیلہ غاتے کاریم اٹ اتنگ انگ ءِ صوبائی حکومت نا پارت آ لوکل گورنمنٹ ناملازم آتا چھٹی تے منسوخ کننگانے و ایمرجنسی سیل اس جوڑ کرسا حالیت آتے مانیٹر کننگ انگ ءِ، صوبائی حکومت لوکل گورنمنٹ ءِ ودکی فنڈ آتا فراوانی ءِ پک کے تانکہ ڈسٹرکٹ کونسل نا دنگ اٹ بروک آ بھلا نالہ غاتا سفائی ءِ پک کننگ مرے۔ داہیت ءِ او پنچ شنبے نادے آ تینا دفتراٹی ملازم آتیان تران و صحافی تتون گپ وتران کرسا پارے۔ عصمت اللہ بازئی پارے کہ ہراتم آن او ایڈمنسٹریٹر لوکل گورنمنٹ نا چارج ءِ سنبھالانے ہمودے آن اینو اسکان دے و نن علاقہ ٹی سفائی و الس ءِ آسراتی تا فراوانی کن کاریم کننگ ءِ۔ اوپارے کہ ڈسٹرکٹ کونسل نا دنگ اٹ واقع اغبرگ، نوحصار، کیچی بیگ، کچلاک، بلیلی و ایلو گنجان آبادی علاقہ غاتیا تالان لوکل گورنمنٹ کچ اٹنگا وسیلہ غاتیٹی مرسا علاقہ ٹی سفائی کن کوشست کننگ ءُ، وزیراعلیٰ بلوچستان میر عبدالقدوس بزنجو، صوبائی وزیر بلدیات سردار محمد صالح بھوتانی و سیکرٹری لوکل گورنمنٹ دوستین جمالدینی نا خاص پارت آ لوکل گورنمنٹ اٹی ایمرجنسی نافذ کرسا ملازم آتے چھٹی تے منسوخ کننگانے و لوکل گورنمنٹ نا دفتر اٹی ایمرجنسی سیل اس جوڑ کننگانے ہرا غٹ حالیت آتے مانیٹر کننگ ءِ۔ اوپارے کہ ساڑی آ پِر تیان ڈسٹرکٹ کونسل نا ایریاٹی بروک آ علاقہ غاتیٹی جانی و مالی نسخان مسنے صوبائی حکومت و پی ڈی ایم اے تون اواری اٹ زہمی تا ہرممکن کمک ءِ پک کننگ انگ ءِ۔ اوپارے کہ ڈسٹرکٹ کونسل تون فنڈ کچ اٹ مننگ نا سوب آن گڑاس مشکل آتون مون تروئی تمک صوبائی حکومت لوکل گورنمنٹ ءِ ودکی فنڈ آتا فراوانی ءِ پک کے تانکہ علاقہ ٹی سفائی و بھلا نالہ غاتے ساف کننگ مرے۔ اوپارے کہ لوکل گورنمنٹ نا غٹ مشینری ، لورڈ و عملہ دے ونن علاقہ ٹی کاریم کننگ ءُ تانکہ مخلوق ءِ ہچ وڑنا غاو مف۔
