اسلام آباد۔ 28 جولائی (اے پی پی) وزیراعظم شہباز شریف مچ آ ملک اٹی بشامی آ پِر و نوکاپ آن زہمی علاقہ غاتیٹی نسخان نا تعین کن بنجائی وزیر آتا کمیٹی اس ٹہیفینے و زہمی ہند آتا معاوضہ ءِ ودفنگ نا پارت کرینے، کمیٹی بروک آ چار دے انا تہہ ٹی غٹ زہمی علاقہ غاتا دورہ ءِ کیک، کمیٹی نا سفارش آ زہمی تا بحالی کن جوان ڈٹ اس جوڑ کننگک۔ پنچ شنبے نادے آ وزیراعظم آفس نا میڈیا ونگ آن جاری بیان نا رداٹ وزیراعظم نا کماشی ٹی ساڑی آ پِر و نوکاپ اٹی نسخان تا جاچ ءِ ہلنگ کن دیوان اڈ ہلک۔ وزیراعظم نا پارت آ مچ آ ملک اٹی بشامی آ پِر و نوکاپ آن زہمی علاقہ غاتیٹی نسخان نا تعین کن بنجائی وزیر آتا کمیٹی اس ٹہیفنگا۔ کمیٹی بروک آ چار دے انا تہہ ٹی غٹ زہمی علاقہ غاتا دورہ ءِ کیک اوکان پد 4 اگست آ کمیٹی نا سلاہ و سوج آتے مون آ تخسا گونڈ مدتی، نیام و مریس مدتی جوان پلان اس جوڑ کننگک۔ وزیراعظم پارت کرے کہ زہمی و ٹھپی تا کمک ءِ 50 ہزار آن ودفسا 2 لکھ اسکان کننگے، کچہ و پکا ہند آتا جتا امداد ءِ ختم کرسا غٹ زہمی ہند آتیکن اسہ وڑنا امداد فراوان کننگے، جزوی وڑاٹ زہمی ہند آتا امداد 25 ہزار آن ودفسا دونیم لکھ و پورو وڑاٹ زہمی اُراتیکن 50 ہزار آن ودفسا 5 لکھ کننگے۔ وزیراعظم پارے کہ بنجائی حکومت دا قدرتی آفت نا اثرآتون مون تننگ کن صوبائی حکومت آتا پبی کمکاری ءِ کیک۔ پاکستان ننا غٹ انا زمواری ءِ، تین پہ تینی کمکاری اٹ زہمی مخلوق نا کمک ءِ کیرہ ۔ وزیراعظم پارت کرے کہ قومی و صوبائی ڈیزاسٹرمینجمنٹ اتھارٹی نا جاگہ غا ڈیزاسٹر رسک مینجمنٹ نا حکمت عملی آ عملدرآمد ءِ پک کیر۔ تعلقدار وزارت آک و ادارہ غاک جہانی ڈونر ایجنسی تتون رابطہ تخسا مالی کمکاری نا دوئی کننگ کن کوشست آتے ترند کیر۔ کراچی ٹی ساڑی آ پِر و نوکاپ آن زہمی انفراسٹرکچر نا بحالی کن سپریم کورٹ اٹی ساڑی فنڈ انا فراوانی کن بنجائی حکومت شرفمند آ عدالت ءِ چٹھی اس نوشتہ کیک۔ اوپارے کہ موسمیاتی بدلی ساڑی آ دورہ انا اسہ حقیقت اسے ہرانا اثرپاکستان تون اوار مچ آ دنیا ٹی بھسکاری کننگ ءِ۔ پِر ونوکاپ اٹی پی ڈی ایم اے ، این ڈی ایم اے و صوبائی حکومت آتا کمکی کارروائی ستاکڑزک۔
