اسلام آباد۔ 28 جولائی (اے پی پی) صدر مملکت ڈاکٹر عارف علوی زڑدوئی نا توننگ کن دتر نا رکھ گدریفنگ ءِ پک کننگ نا گرج آ زور شاغسا پارینے کہ زڑدوئی نا درمان و توننگ آ زرکاری آن پاکستان اٹ زڑدوئی آن مروک آ مرک آتیٹی نمان کمتی اتنگ مریک۔ ایوان صدر نا پریس ونگ انا رداٹ صدر مملکت داخیال آتا درشانی ءِ زڑدوئی نا جہانی دے انا وخت آ تینا کلہو اٹی کرے۔ اوپارے کہ زڑدوئی جان جوڑی کن جہانی خطرہ تون اوار اوار ناجوڑ ی ومرک آتا سوب ءِ، جہانی یوم زڑدوئی آ ننے نہادی جان تے بچفنگ کن زوت تشخیص و درمان نا بارواٹ آگاہی ودی کننگ نا گرج ءِ۔ صدر مملکت پارے کہ ہر 30 سکینڈ اٹی اسہ بندغ اس زڑدوئی تون تعلقدار ناجوڑی نا سوب آن کہیک، اندازہ غاتا رداٹ ہر13 بالغ پاکستانی تیان اسٹ اس زڑدوئی سی انا گواچی ءِ۔ صدر پارے کہ 97 لکھ آن زیات بندغ زڑدوئی سی اتون زند ءِ تیر کننگ ءُ، ہرسال کم و ود 27 ہزار بندغ زڑدوئی نا پیچیدگی تا سوب آن کہیرہ۔ صدر مملکت پارے کہ زڑدوئی سی اسہ چپ ءِ قاتل اسے، زڑدوئی سی آن اسہ وار زہمی بندغ تینا جون اٹی دین ءِ ہلیک تخک۔ پاکستان اٹی 86 درسد بندغ تینا خاہوت اسکان زڑدوئی نا گدریفنگ نا خطرہ نا بے سما ءُ۔ ڈاکٹر عارف علوی پارے کہ اگہ جوان گام گیج کننگتو تو زہمی بندغ آتا کچ 90 لکھ آن ودسا اسہ کروڑ 5 لکھ مریک، ڈیوالئی نا حالیت اٹ 2030ء اسکان زڑدوئی آن مروک آ مرک آک 27 ہزار آن ودسا 31 ہزار مریرہ۔ صدر مملکت پارے کہ زڑدوئی نا زوت تشخیص کن دمدستی وڑاٹ ٹیسٹ کرفنگ و ہموفک ہرافتے مرض لاحق ءِ اوفتے زوت درمان کرفنگ نا گرج ءِ۔ اوپارے کہ پاکستان زڑدوئی نادوائی بھاز اڑزآن نہاد آ تیار کننگ ءِ، مون انگا زڑدوئی نا چٹفنگ نئے بیرہ پاکستان کن ممکن ءِ بلکن عمل نا قابل ہم ارے۔ صدر مملکت پارے کہ نے سرنچ آتا دُوارہ کاریم اٹ اتنگ ءِ توننگ و انفیکشن ءِ کنٹرول کننگ نا وڑوڈول ءِ تینا کروئی مریک۔ اوغٹ اسٹیک ہولڈر آتیا زور شاغا کہ او زڑدوئی نا زوت تشخیص نا بارواٹ آگاہی ودی کیر۔
