کوئٹہ۔ 28 جولائی (اے پی پی) پدریسہ پِر و نوکاپی دیرک بلوچستان نا چندی ضلع غاتیٹی بھسکاری کریر، سد آ خلق آتے دیردرے، لکھ آ بندغ آک بے اُرا مننگ آ بیوس مسنو، صوبائی حکومت ، پاک آرمی نا ریلیف بحالی آپریشن برجاءِ، محکمہ پی ڈی ایم اے نا رداٹ بشام نا ساڑی آ پِرتیان 100 آن زیات بندغ زوال وخت اس کہ 600 کلومیٹر سڑک آک پورو وڑاٹ بھس، چندی ہند آک تمانو وخت اس کہ 10 آن زیات قومی کسرآک بھس مسنو، تباہ کن پِر تیان بلوچستان و سندھ ءِ ملفوک آ پول و سڑک آتے نوکاپی دیر درینے، ساڑی آ پِر تیٹی کم و ود 16 آن زیات ڈیم ہم پنانو وخت اس کہ 21 ٹیوب ویل پورو وڑاٹ بھس مسنو و 2 لکھ آن زیات کشاری ڈغار پورو وڑاٹ بھس مسنو، بشام نا پِر و اوٹی ودی مروک آ نوکاپی حالیت و نسخان تیان پد حکومت بلوچستان صوبہ نا بھاز زہمی 20 آن زیات ضلع غاتے آفت زدہ گوندسا زوال کروک آ بندغ آتیکن 10، 10 لکھ روپئی نا پڑو ہم کرے وخت اس کہ ترند بشام نا پِر تا ساڑی آ پِر تا بھسکاری تیان پد صوبائی حکومت بنجائی حکومت آن 50 ارب روپئی نا خواست ہم کرینے، ڈی جی پی ڈی ایم اے نصیر ناصر نا رداٹ پِر و نوکاپی دیر تا سوب آن 30 زالبول، 33 چنا 40 آن زیات نرینہ قدرتی آفت اٹی زوال کرینو، ساڑی آ پِر تیان کچہ انگا آبادی تے زہمی کرسا دیر اُراتیٹی پترینگ انگ آن السءِ مشکل مون تروک ءِ، بلوچستان نا چندی علاقہ غاتیان ملوک آ حوال آتا رداٹ کچی آبادی نا ہنکینی ہند آتا چھت آتا تمنگ آن زوال کریر وخت اس کہ ڈیم تا بھس مننگ آن کیہی خلق آتے دیر ہرفینے ہراڑے ہزار آ خاہوت بے چھت آن کمک نا چاری ءُ، کوئٹہ ءِ سندھ اتون ملفوک آ کسرآک پِننگ نا گواچی ءُ ہرانا سوب آن ٹریفک بند مننگ آن ہزار آ گاڈی تا لین لگا، لسبیلہ و ایب و کیب اٹی 450 آن زیات بندغ نوکاپی دیر اٹی اختہ مسر ہرافتیان 50 بندغ آتے ریسکیو کننگا۔ خضدار ، جھل مگسی، جعفر آباد، نصیر آباد، پشین، قلعہ سیف اللہ کوئٹہ، ژوب، اوستہ محمد، گنداخہ، سبی ، لہڑی ، ہرنائی ٹی بشام نا مسٹ میکو اسپیل نا پِر تا چرجوئی برجاءِ۔ صوبائی حکومت ، پی ڈی ایم اے، ضلعی انتظامیہ و پاک فوج انا کنڈآن زہمی علاقہ غاتیٹی ریلیف و بحالی آپریشن برجاءِ، زہمی خاہو ت کنوئی آ گڑا و ایلو المی آ گڑاتا فراوانی نا چرجوئی ہم برجاءِ، پورو بھس علاقہ غاتا آبادی تے رکھ ہند آتیا گدریفنگ انگ ءِ نوکاپ اٹی پنوک آ ڈیم، شاہراہ و پول آتا بحالی کن پبی گام گیج کننگ انگ ءِ ، بلوچستان اٹی برجا بھسکاری تیان پد ڈبلیو ایچ او تون اوار کیہی جہانی ادارہ غاتا کنڈآن نوکاپ زہمی تا بحالی و کمک ناچرجوئی ہم برجاءِ ولے صوبائی حکومت ناکافی وسیلہ و گیشتر رقبہ نا رداٹ بنجائی حکومت آن 50 ارب روپئی نا درخواست کرینے تانکہ نوکاپ زہمی و بھس اسٹرکچر نا بحالی ءِ زوت آن زوت پورو کننگے۔
