اسلام آباد۔ 28 جولائی (اے پی پی) بنجائی وزیر حوالکاری و شینکاری مریم اورنگزیب پائیدار شونداری ہدف آتا دوئی کننگ کن ورناتا کڑد انا اہمیت آ زور شاغسا پارینے کہ پائیدار شونداری ہدف آتا دوئی کننگ کن کانود سازی کننگک، ہراتم اسکان پارلیمنٹرین آک بامسخت شونداری ہدف آتیٹی مشغول مفسہ ہمووخت اسکان شونداری نا ہچ ءُ ایجنڈا اسے دوئی کننگ مفک، وزیراعظم ڈیزاسٹررسک مینجمنٹ آ کاریم کننگ نا پارت کرینے، موسمیاتی بدلی نا سوب آن اینخو سال زیات پِر مس، داوخت آ ملک اٹی ترند نوکاپی حالیت آتا مون تروک ءِ۔ پنچ شنبے نادے آ داڑے پائیدار شونداری ہدف آتیا اِرادے ئی سیمینار نا ایسری سیشن آن تران کرسا بنجائی وزیر حوالکاری پارے کہ ایاز صادق نا کماشی ٹی پاکستان نا اولیکو پارلیمنٹ ئسک ہرا پائیدار شونداری ہدف آتے ادارہ جاتی دروشم اس تس، اینو داٹی غٹ صوبہ غاتا نمائندگی ساڑی ءِ، ہندا دانا اصل روح ءِ۔ اوپارے کہ نن 2016 ء ٹی پارلیمان نا تہہ ٹی ایس ڈی جیز جوڑ کرین، اوناتہہ ٹی پپس انا دفترجوڑ کرسا اودے متحرک کرین۔ اوپارے کہ ایاز صادق ایس ڈی جیز کن ہرا کوشست آتے سرتس، اینو اونا اثر غٹ انا مون آٹے۔ بنجائی وزیر حوالکاری پارے کہ ہراتم اسکان پارلیمنٹرین آک و ہندی حکومت آتا نمائندہ غاتے پائیدار شونداری ہدف آتیکن مشغول کننگپک ، ہمووخت اسکان اسہ ہم شونداری ہدف اسے دوئی کننگ ممکن اف۔ اوپارے کہ دنیا پائیدار شونداری ہدف آتیان مون آہِننگ ءِ، 2022ء آن 2030 ء اسکان ایس ڈی جیز نا مانیٹرنگ و جاچ ءِ ہلنگک کہ ٹارگٹ ہراوڑ پورو مس۔ اوپارے کہ ایس ڈی جیز نا فریم ورک مچ آ دنیا تون اوار ہمسایہ ملک آتیٹی ہم کاریم کننگ ءِ۔ بنجائی وزیر حوالکاری پارے کہ موسمیاتی بدلی نا سوب آن داوخت آ ملک ترند نوکاپی حالیت آتا گواچی ءِ، بلوچستان پِر تیان بھاز زہمی مسنے۔ اوپارے کہ وزیراعظم شہباز شریف اینوڈیزاسٹر رسک مینجمنٹ نا بابت دیوان نا کماشی ءِ کرے و ڈیزاسٹررسک مینجمنٹ آ کاریم کننگ نا گرج آزور شاغا۔ بنجائی وزیر حوالکاری پارے کہ پدتموک ملک آک ڈیزاسٹر رسپانس اٹی زیات زرکاری کیرہ ولے ڈیزاسٹررسک مینجمنٹ اٹی اوفتا بجٹ بھاز کم ءِ۔ اوپارے کہ ایس ڈی جیز اٹی زالبول آتا کچ اٹی ودکی مسنے۔ ایس ڈی جیز نا چیئر پرسن مبارکباد نا حقدار ءِ۔ اوپارے کہ پاکستان نا آبادی نا 65 درسد بشخ ورناتیا تالان ءِ، ایس ڈی جیز اٹی اوفتا مشغولیت اٹی ہم ودکی مسنے۔ اوپارے کہ ضلعی و یونین کونسل نا کہول آہم ورناتے پائیدار شونداری ہدف آتیکن پالیسی جوڑ کننگ اٹ اوار کننگ نا گرج ءِ۔ بنجائی وزیر حوالکاری پارے کہ 2016 ء ٹی اولیکو وار ایس ڈی جیز کن بجٹ جتا کننگا۔
