اسلام آباد۔ 28 جولائی (اے پی پی) پاک فوج و ایف سی نا دستہ غاک ساڑی آ نوکاپ آن زہمی علاقہ غاتیٹی کمکی سرجزآتیٹی سول انتظامیہ نا پبی کمک ءِ کننگ ءُ۔ آئی ایس پی آر نا رداٹ بلوچستان اٹی آرمی ایوی ایشن نا اِرا ہیلی کیپٹر کراچی آن اوتھل، لسبیلہ نا علاقہ غاتیکن روانہ کننگانے۔ دا ہیلی کیپٹر آک تدوک آ 48 گھنٹہ ٹی ہم کمکی سرجزآتیٹی بشخ ہلکوسر ولے خراب موسم نا سوب آن زیات ہرے اسکان بال کننگ کتور۔ داسہ دا ہیلی کیپٹر آتا کمک اٹ اختہ مروک آ مخلوق ء ِ رکھ و المی کمکی گڑاتا گدریفنگ نا عمل برجاءِ۔ گوادر اٹی جنرل آفیسر کمانڈنگ ریسکیو و ریلیف سرجزآتا چاروکی کن اوتھل نا علاقہ نا دورہ ءِ کرے وخت اس کہ اینو خضدار اٹی سینئر ہندی کمانڈر خضدار و کیبی نا نوکاپ آن زہمی علاقہ غاتاہ دورہ ءِ کیک۔ اوتھل، جھل مگسی ٹی گراؤنڈ ریسکیو و ریلیف ٹیمک مخلوق ءِ رکھ ہند آتیا گدریفنگ و ہندی ہنکینی تے خور و دیر انا فراوانی ٹی لگوک ءُ۔ ڈاکٹر و پیرامیڈیکس زہمی بندغ آتے طبی امداد فراوان کننگ ءُ۔ کوسٹل ہائی وے ءِ ہروڑنا ٹریفک کن ملنگانے۔ بھس مروک کمیونیکیشن انفراسٹرکچر نا جوڑ جاڑ و یوٹیلیٹی سروسز آتے بحال کننگ نا کوشست برجاءِ۔ تربت اٹی پِننگ نا گواچی مروک آ رکھی بند آتے جوڑ جاڑ کننگانے۔ پنجاب نا علاقہ ڈی جی خان اٹی نوکاپ و طوفانی پِر تیان زہمی ہند آتیا پاک فوج کمکی کوشست آتیٹی سول انتظامیہ نا کمک ءِ کننگ ءِ۔ نوکاپ آن زہمی ہندی مخلوق ءِ طبی کمک فراوان کننگ کن فوج انا کنڈآن 2 میڈیکل کیمپ جوڑ کننگانے۔ سندھ انا علاقہ کراچی ٹی دیر ءِ کشنگ نا کوشست آتیان بیدس جامشورو وگھارو نا علاقہ غاتیٹی فوج کمکی سرجزآتیٹی لگوک ءِ۔
