اسلام آباد۔ 28 جولائی (اے پی پی) چیئرمین سینیٹ محمد صادق سنجرانی لسبیلہ، اوتھل و بلوچستان نا ایلو ضلع غاتیٹی ساڑی آپِر و نوکاپی دیر تیان مروک آ جانی و مالی نسخان تیا است ہسونی نا درشانی ءِ کرینے۔ پنچ شنبے نادے آ سینیٹ سیکرٹریٹ آن جاری بیان نا رداٹ چیئرمین سینیٹ پارے کہ ضلعی انتظامیہ، ڈیزاسٹر مینجمنٹ و ریسکیو کمامدار زہمی تے دمدستی کمک فراوان کیر۔ اوپارے کہ غٹ رابطہ سڑک آتے بحالی کن ہلہلہ ئی بنداو تیا گام گیج کننگے۔ دیری آ علاقہ غاتا آبادی تا رکھ جاگہ غاتیا گدریفنگ کن بست وبند کننگے۔ چیئرمین سینیٹ نوکاپی حالیت آتون مون تننگ کن فوج و صوبائی حکومت نا کوشست آتا ستا ءِ کرے۔ چیئرمین سینیٹ ساڑی آ طوفانی پِر تیٹی زوال کروک آ بندغ آتا درجہ غاتا بڑزی و ٹھپی تا زوت دراخ جوڑی کن دعا کرینے۔ چیئرمین سینیٹ نا ضلع لسبیلہ نا خڑک اودگی ٹی علاقہ والاتے رکھ جاگہ غاتیا گدریفنگ نا پارت کرینے۔
