اسلام آباد۔ 28 جولائی (اے پی پی) بنجائی وزیر قومی جان جوڑی عبدالقادر پٹیل پارینے کہ قطبی وزیرستان آن پولیو نا کیس اسے نا پک کننگ آن پد جم وڑاٹ پاکستان اٹی اینخو پولیو کیس آتا کچ 14 مسنے، سویلی خیبرپختونخوا ٹی پولیو مہم 15 اگست آن بناکننگ ءِ۔ تینا اسہ بیان اسے ٹی اوپارے کہ پولیو دین انا چٹفنگ کن انجکشن ویکسین نا بناءِ ہم کننگانے، قطبی وزیرستان آن پولیو کیس پک مسنے، داتم اسکان مروک آ غٹ کیس آک قطبی وزیرستان آن رپورٹ مسنو، جم وڑاٹ پاکستان آن اینخو پولیو کیس آتا کچ 14 مسنے۔ اوپارے کہ حکومت پولیو نا چٹفنگ کن پبی عملی گام گیج آتے جنگی بنداو تیا پک کننگ ءِ۔ بنجائی وزیر جان جوڑی عبدالقادر پٹیل پارے کہ خیبرپختونخوا نا سویلی ضلع بشمول سویلی و قطبی وزیرستان، ڈی آئی خان، بنوں، ٹانک و لکی مروت پولیو دین اکن حساس گوندنگانے اینخو بنوں آن ہم اپریل و مئی ٹی چاگڑدی وڑتیٹی دین پک مسوسس، ہراڑآن پک مریک کہ پولیو دین نا تالانی قطبی وزیرستان اسکان محدود اف۔ دین دا ضلع غاتیٹی بھلو حداسسکان ساڑی ءِ، دین انا چٹفنگ کن پبی مربوط حکمت عملی اس ٹہیفینے و پولیو کن حساس گوندنگوک آ ضلع غاتیٹی ہلہلہ ئی گام گیج آتیان ویکسین نا رسینگ نا کچ اٹی ودکی مسنے۔ اوپارے کہ سویلی خیبرپختونخوا ٹی پولیو دین نا چٹفنگ کن انجکشن ویکسین نا بناءِ ہم کننگانے، دین انا چٹفنگ کن حفظان جان جوڑی کٹ ہم بشخنگانے۔ اوپارے کہ پاکستان اٹی اینخو غٹ کیس آک سویلی خیبرپختونخواآن رپورٹ مسنو، ہرافتے ٹی قطبی وزیرستان آن 13 کیس رپورٹ مسنے۔ اوپارے کہ نن زیات آن زیات چناتے ویکسین نا فراوانی ءِ پک کننگ اُن، سویلی خیبرپختونخوا ٹی پولیو مہم 15 اگست آن بناکننگ ءِ۔ اوپارے کہ دین انا پورو چٹفنگ اسکان آرام اٹ تولپنہ۔
