اسلام آباد۔ 28 جولائی (اے پی پی) پاکستان و چین نا نیام اٹ واپار نا کچ اٹی تدوک آ مالی سال اٹی نمان ودکی ریکارڈ کننگانے، تدوک آ مالی سال اٹی چین ءِ پاکستان نا برآمد آتیٹی 36 درسد و چین آن درآمد آتیٹی 30 درسد نا نمو ریکارڈ کننگانے۔ اسٹیٹ بینک انا کنڈآن دوئی حساب وکتاب نا رداٹ مالی سال 2022 اٹی چین ءِ پاکستان نا برآمد آتا کچ 2.781 ارب ڈالر ریکارڈ کننگا ہرا مالی سال 2021 نا مقابلہ ٹی 36.08 درسد زیاتءُ، مالی سال 2021 اٹی چین ءِ برآمد آتیان ملک ءِ 2.043 ارب ڈالر نا زرمبادلہ دوئی مسوسس، جون اٹی چین ءِ پاکستانی برآمد آتا کچ 238.24 ملین ڈالر ریکارڈ کننگا ہرا تدوک آ سال جون انا مقابلہ ٹی 12.78 درسد زیات ءُ، تدوک آ سال جون اٹی چین ءِ پاکستانی برآمد آتا کچ 211.23 ملین ڈالر ریکارڈ کننگاس۔ حساب وکتاب نا رداٹ تدوک آ مالی سال اٹی چین آن درآمد آتے ٹی 30.03 درسد نا نمو ریکارڈ کننگانے، مالی سال 2022 اٹی چین آن 17.29 ارب ڈالر نا درآمد ریکارڈ کننگا ہرامالی سال 2021 اٹی 13.30 ارب ڈالرئسر، جون اٹی چین آن درآمد آتیا 1.607 ارب ڈالر نا زرمبادلہ خڑچ مس ہراتدوک آ سال جون نا مقابلہ ٹی 14.79 درسد زیات ءُ، تدوک آ سال جون اٹی چین آن 1.845 ارب ڈالر نا درآمد ریکارڈ کننگاسس۔
