اسلام آباد۔ 28 جولائی (اے پی پی) پیٹرولیم مصنوعات نا درآمد آتیٹی تدوک آ مالی سال اٹی سالانہ بنداو تیا 92 درسد نا نمو ریکارڈ کننگانے۔ پاکستان بیورو شماریات و اسٹیٹ بینک نا کنڈآن دا بابت دوئی حساب وکتاب نا رداٹ مالی سال 2022 اٹی پیٹرولیم مصنوعات آتا درآمد آتیا 18.74 ارب ڈالر نا زرمبادلہ خڑچ مس ہرا مالی سال 2021 نا مقابلہ ٹی 92 درسد زیات ءِ، مالی سال 2021 اٹی پیٹرولیم مصنوعات آتا درآمد آتا کچ 9.74 ارب ڈالر ریکارڈ کننگاسس۔ مئی نا مقابلہ ٹی جون نا تُو اٹی پیٹرولیم مصنوعات نا درآمد آتیٹی ماہانہ بنداو تیا 109 درسد نا نمو ریکارڈ کننگانے، مئی ٹی پیٹرولیم مصنوعات آتا درآمد آتا کچ 1.386 ارب ڈالر ریکارڈ کننگا ہرا جون اٹی ودسا 2.893 ارب ڈالر مس۔ جون اٹی پیٹرولیم مصنوعات آتا درآمد آتیٹی سالانہ بنداو تیا 136 درسد نا نمو ریکارڈ کننگانے، تدوک آ سال جون اٹی پیٹرولیم مصنوعات آتا درآمد آتیا 1.223 ارب ڈالر نا زرمبادلہ خڑچ مس ہرا ہندا سال جون اٹی ودسا 2.893 ارب ڈالر مس، یات سلے کہ مالی سال 2022 اٹی ملکی درآمد آتاجم کچ 72.048 ارب ڈالر ریکارڈ کننگا ہرامالی سال 2021 نا مقابلہ ٹی 33 درسد زیات ءُ، مالی سال 2021 اٹی ملکی درآمد آتا کچ 54.27 ارب ڈالر ریکارڈ کننگاسس۔
