اسلام آباد۔ 27 جولائی (اے پی پی) وزیراعظم شہباز شریف پارینے کہ چین پاکستان اقتصادی راہداری پاکستان نا شونداری و الس نا آسودہی ٹی اہم کڑد ادا کننگ ءِ، چینی کمکاری و زرکاری نا سوب آن پاکستان اٹی انفراسٹرکچر ، پبلک ٹرانسپورٹ نا شونداری و بجلی نا تنکی تا مون ءِ توننگ اٹ بھاز کمک رسینگا ، چینی کمکاری اٹ برجا شونداری ڈٹ آتے پین سلنگ نا گواچی مننگ کن الیپنہ۔ وزیراعظم آفس نا میڈیا ونگ آن جاری بیان نا رداٹ داخیال آتا درشانی ءِ او شنگھائی الیکٹرک نا صدر لوپھنگ نا کماشی ٹی چینی ڈل اتون گپ وتران کرسا کرے ہرا چارشنبے نادے آ داڑے اوڑتون اوڑدہی کرے۔ اوڑدہی ٹی مسکوہی وزیراعظم شاہد خاقان عباسی ، بنجائی وزیر بجلی خرم دستگیر خان ، وزیر مملکت پیٹرولیم ڈاکٹر مصدق ملک، خصوصی کمکار ظفرالدین محمود، ڈاکٹر جہانزیب خان و تعلقدار بڑزکو کمامدارآک ساڑی ئسر۔ داوخت آ وزیراعظم پارے کہ چین پاکستان اقتصادی راہداری پاکستان نا شونداری و داجاگہ نا مخلوق نا آسودہی ٹی اہم کڑد ادا کننگ ءِ۔ چینی صدر شی جن پنگ و چینی سرکڑدہ غاتا پاکستان نا ہرمشکل ریسہ ٹی کمک آ کنتون اوار مچ آ قوم اوفتا منت وارءِ۔ چینی کمکاری و زرکاری نا سوب آن پاکستان اٹی انفراسٹرکچر ، پبلک ٹرانسپورٹ نا شونداری و بجلی نا تنکی آ بھلو حد اسسکان مون ءِ توننگ اٹ کمک رسینگا۔ اوپارے کہ چینی کمکاری اٹ برجاشونداری ڈٹ آتے پین سلنگ نا گواچی مننگ کن الیپنہ۔ حکومت چینی کمپنی تون کمکاری و زرکاری ءِ ودفنگ کن سنجیدگی اٹ گام گیج کننگ ءِ۔ چینی کمپنی تا انجینئر و مزور آتا رکھ اکن غٹ تر المی گام گیج کننگ انگ ءِ۔ وزیراعظم پارے کہ تھرکول پاور پروجیکٹ ہرابھاز مہالو پورو مروئی ئسک، عمران نیازی نابود حکومت اٹ دانستہ وڑاٹ اودے سلنگ نا گواچی جوڑ کننگا۔ دانا پوروی آن ہندی کولاآن 1320 میگاواٹ بجلی نا الس ءِ زوت فراوانی ممکن مننگ کیک۔ وزیراعظم تھرکول پروجیکٹ نا زوت پوروی ٹی چینی کمپنی شنگھائی الیکٹرک تون کمکاری کن خصوصی کمکار ظفرالدین محمود و ایڈیشنل سیکرٹری ندیم چوہدری ءِ نمائندہ خصوصی نا زمواری ءِ تس۔ وزیراعظم پارے کہ چینی کمپنیک پاکستان اٹ برق رفتاری اٹ ڈٹ آتا پوروی ءِ پک کرے، ہراستاکڑزک۔ اوڑدہی ٹی وزیراعظم ءِ پاننگاکہ 1320 میگاواٹ تھرکول پاور پروجیکٹ تدوک آ سال آتیٹی سلنگ نا گواچی ئس ولے ساڑی حکومت نا کمکاری نا سوب آن نئے بیرہ داڑآ ترندی اٹ کاریم برجاءِ بلکن 2023 نا اولیکو سہ ماہی ٹی اودے پورو کننگک۔ ڈٹ انا سوب آن 7000 ہندی مخلوق ءِ روزگار فراوان کننگا، دیوان ءِ داہم پاننگاکہ شنگھائی الیکٹرک پاکستان اٹ جنریشن ، ٹرانسمیشن و ڈسٹری بیوشن اٹی پین زرکاری ٹی بھاز است خواہی تخک ہرانا وزیراعظم ستاءِ کرے۔ شنگھائی الیکٹرک نا صدر وزیراعظم و اونا ٹیم نا ڈٹ انا پوروی کن کمکاری آ منت واری ءِ ہرفے۔
