اسلام آباد۔ 27 جولائی (اے پی پی) بنجائی وزیر ڈٹ بندی شونداری و اصلاحات و خصوصی گام گیج احسن اقبال پارینے کہ پارلیمنٹ پائیدار شونداری نا ہدف آتا دوئی کننگ اٹ تینا کڑدءِ ادا کے و درکار وسیلہ و کانود جوڑ کننگ ءِ پک کے۔ داخیال آتا درشانی ءِ او چارشنبے نادے آ پائیدار شونداری نا ہدف آتا بابت سیمینار آن تران کرسا کرے۔ اوپارے کہ 2018 ٹی حکومت ءِ ہلان تو شونداری بجٹ اسہ ہزار ارب ئس، ملک اسے نا شونداری بجٹ کم مرسا کے تو او امر مون آ کاہک۔ اوپارے کہ ہراتم نن پدی بسن تو اونا شونداری بجٹ کم مرسا 550 ارب نا خڑک ئسک، ہرافک دا دعویٰ کیرہ کہ نن بھاز شون ہلکن تو شونداری بجٹ وخت اس ہم نیمہ مفک۔ اوپارے کہ ورناک ننا میرات ءُ، اوفتے گچین آسراتی تا فراوانی ننا زمواری ءِ۔ تعلیم، جان جوڑی ، امن ، رکھ ہموہدف آک ءُ ہرافتے ٹی سیاسی اختلاف بایدے مف، پارلیمنٹ نا باسک آتا دا فرض ءِ کہ او دا بابت گام گیج کیر، بھاز انگا ملک آک پی ایس ڈی پی نا بابت ننے آن مون آٹو۔ اوپارے کہ ننے دنیا تون ہم گرنچ مننگ کن پین گام گیج کننگ نا گرج ءِ۔ اوپارے کہ پاکستان دنیا نا اولیکو ملک ئس ہراپائیدار شونداری نا ہدف آتے امنا کرے، داوخت آ ہرا زرگزرانی حالیت آک ءُ اوفتا سوب آن پائیدار شونداری نا ہدف آتیا گڑتی ءِ، ساف تہو، ساف دیر و ساف ڈغار بنداوی حق اٹی اوار ءُ، پاکستان اٹی اِرا تہائی آبادی ورناتیاٹی ءِ ، ورناتے شوندساری نا وارخواہی تتون تو حالیت آتا سنگین مننگ نا گڑتی ءِ ، ننے تینا طرز عمل ءِ ہمو ملک آتیان ہیل کروئی مریک ہرافک شون ہلکنو، ہراڑے اِرا تہائی آبادی ورناتیا تالان مرے و اوفتے گچین تعلیم و روزگار تفس تو زرگزران شون ہلنگ کپک۔ اوپارے کہ حکومت 2013 ٹی وژن 2025 شین تس تانکہ ملک ءِ دنیا نا اولیکو 25زرگزران تیٹی شمار کننگ مرے۔ 2017 ٹی پرائس واٹر ہاؤس داپارے کہ اگہ پاکستان ہندا رفتار اٹ چلینگا تو 2030 اسکان دا دنیا نا اولیکو 30 زرگزران تیٹی اوار مریک۔ اوپارے کہ شونداری ہدف آک ہر سیاسی جماعت نا منشور نا بشخ مریرہ ہنداخاطرآن پارلیمنٹ قومی امنائی سلاہ اٹ اسہ روڈ میپ اس جوڑ کے ہرانارداٹ 2030 اسکان نا ہدف آتا دوئی ءِ پک کے۔
