اسلام آباد ۔ 27 جولائی (اے پی پی) بنجائی وزیر قومی جان جوڑی عبدالقادر پٹیل پارینے کہ منکی پاکس دین انا گچین چاروکی ءِ کننگ انگ ءِ، داتم اسکان دنیا نا 75 ملک آتیان 16 ہزار کیس رپورٹ مسنے۔ داخیال آتا درشانی ءِ او منکی پاکس آ خصوصی دیوان اٹی گپ وتران کرسا کرے۔ دیوان اٹی بنجائی اسپیشل سیکرٹری، ڈی جی ہیلتھ ، وزارت داخلہ و ایف آئی اے نا نمائندہ غاک بشخ ہلکر۔ دیوان ءِ پاننگاکہ ڈبلیو ایچ او منکی پاکس آ پبلک ہیلتھ ایمرجنسی نافذ کرینے۔ داوخت آ بنجائی وزیر جان جوڑی پارے کہ غٹ ہسپتال آتے منکی پاکس کن المی گام گیج آتا پارت جاری کننگانے۔ اوپارے کہ منکی پاکس دین انا گچین چاروکی ءِ کننگ انگ ءِ۔ داتم اسکان دنیا نا 75 ملک آتیان 16 ہزار کیس رپورٹ مسنے۔ پاکستان اٹی داتم اسکان منکی پاکس انااسہ رپورٹ اس ہم مون آ بتنے۔ پاکستان اٹی منکی پاکس آن بچفنگ کن غٹ تر المی گام گیج آتے پک کننگ انگ ءِ۔ عبدالقادر پٹیل پارے کہ صوبائی و بنجائی کہول آ لیبارٹریک منکی پاکس دینءِ پک کننگ کن پورو تیار ءُ۔ وزارت جان جوڑی پدریسہ منکی پاکس اتون تعلقدار غٹ امور آتا جاچ ءِ ہلنگ ءِ۔
