تدوک آ دور حکومت اٹ خولم نا خواست و کوڑی تیکن جوان ڈٹ بندی کپرسا الس تون نا انصافی کننگا، وزیراعظم

اسلام آباد۔ 26 جولائی (اے پی پی) وزیراعظم شہباز شریف تدوک آ پونے چار سال اٹی خولم نا کوڑی تا بابت جوان ڈٹ بندی مفننگ آ گڑتی نا درشانی ءِ کرسا پارینے کہ پاکستان کون آ کشاری ملک اٹی تدوک آ دور حکومت اٹی غذائی تنکی برسا کرے ہرا است ہسونی اسے، خولم نا خواست و کوڑی تیکن جوان ڈٹ بندی کپرسا 22 کروڑ الس تون نا انصافی کننگا۔ سے شنبے نادے آ وزیراعظم آفس نا میڈیا ونگ آن جاری بیان نا رداٹ داخیال آتا درشانی ءِ او تینا کماشی ٹی ملک اٹی خولم نا ساڑی کوڑی، ممکنہ طلب و درآمد نا ٹینڈر آتیا جاچ دیوان آن تران کرسا کرے۔ دیوان اٹی بنجائی وزیر مفتاح اسماعیل، سید نوید قمر، طارق بشیر چیمہ و تعلقدار بڑزکو کمامدار آک بشخ ہلکر۔ وزیراعظم پارت کرے کہ خولم نا آخبت فصل اسکان جاری کننگ تون اوار اوار بفرسٹاک ءِ پک کننگے، خولم نا درآمد اٹی آب و مقدار ءِ پک کننگ کن جہانی کنسلٹنٹ آن کمک ہلنگے و خولم نا ہلنگ اٹی ہراحداسکان ممکن مرے نہاد ءِ کم کرفسا ملک و قوم انا پیسہ ءِ بچفنگے۔ دیوان ءِ پاننگاکہ ملک اٹی ساڑی خولم نا پیدوار نا کساس ءِ 26.389 ملین میٹرک ٹن خلنگا وخت اس کہ تدوک آ سال انا 1.806 ملین میٹرک ٹن کوڑی ساڑی ءِ۔ 30.79ملین میٹرک ٹن جم قومی طلب نا مقابلہ کل کوڑی 28.199 ملین میٹرک ٹن ءِ۔ طلب وکوڑی تیٹی پرخ ءِ چٹفنگ کن حکومت اقتصادی رابطہ کمیٹی نا کمک اٹ وخت آ خولم نا درآمد نا فیصلہ کرے۔ فیصلہ نا رداٹ اولیکو کھیپ آن پد ارٹ میکو ٹینڈر اٹی وزیراعظم نا پارت آتے مون آ تخسا و حکومتی کوشست آتیٹی 300000 میٹرک ٹن آ فی میٹرک ٹن 34.54 ڈالر و جم وڑاٹ قومی خزانہ نا 1 کروعڑ 3 لکھ امریکی ڈالر ءِ بچفنگا۔ دیوان ءِ مستی پاننگاکہ حکومت نا روس اتون معاہدہ نا رداٹ 20 لکھ میٹرک ٹن خولم درآمد آ پیش رفت برجاءِ ہرا گڈیکو ریسہ غاتیٹی ءِ۔ داکان بیدس دیوان ءِ گوادر بندرگاہ نا کمک اٹ خولم نا درآمد آ پیش رفت آ ہم سرجم وڑاٹ معلومدار کننگا۔ وزیراعظم پارت جاری کرے کہ خولم نا گوادر بندرگاہ نا کمک اٹ درآمد ءِ پک کننگ کن گام گیج آتے زوت پک کننگے۔ وزیراعظم خصوصی پارت جاری کرے کہ بفرسٹاک متعین کرسا زوت دا رپورٹ ءِ پیش کننگے۔ وزیراعظم وزارت واپار، وزارت فوڈ سیکورٹی و غٹ تعلقدار وزارت وکمامدار آتا ٹینڈر آتیٹی فی ٹن خڑچ اٹی کمتی کن کوشست آتا ستاءِ کرے۔