وزیراعلیٰ پنجاب نا گچین کاری ٹی ڈپٹی اسپیکر نا رولنگ نا برخلاف کیس انا سماعت کن فل کورٹ اس ٹہیفنگے، آئین ، پارلیمان و اونا فیصلہ غاتا بایدے شرف ءِ کننگے، حکمران سیوت نا راہشون تا اسیجائی پریس کانفرنس اٹی خواست

اسلام آباد۔ 25 جولائی (اے پی پی) حکمران سیوت نا راہشونک وزیراعلیٰ پنجاب نا گچین کاری ٹی ڈپٹی اسپیکر نا رولنگ نا برخلاف درخواست نا سماعت کن فل کورٹ اس ٹہیفنگ نا خواست کرسا پارینو کہ آئین، پارلیمان و اونا فیصلہ غاتا بایدے شرف ءِ کننگے، قومی یکجہتی نا سوچ سیاسی سرکڑدہ غاتون اوار اوار ادارہ غاتاہم بایدے مرے، ہندا حالیت اٹ ملک مشکل حالیت آتیان پیش تمنگ کیک، پاکستان آ ہچ ءُ سمجھوتہ اس کننگ کن تیار افن، ہروڑنا نرم مداخلت جمہوری اصول آتا رداٹ سہی مفک، سیوتی حکومت تینا آئینی مد ءِ پورو کیک۔ داخیال آتا درشانی ءِ حکمران سیوت آن تعلق تخوک آ سیاسی جماعت آتا راہشونک دوشنبے نادے آ داڑے وزیراعظم سیکرٹریٹ اٹی اسیجائی پریس کانفرنس اٹی کریر۔ مسلم لیگ (ن) نا نائب صدر مریم نواز پارے کہ جنگ عظیم دوم نا وخت  دا سوج کننگا کہ اگہ ننا عدالت آک انصاف تننگ ءُ تو کس اس ننے شکست تننگ کپک، ہندا وڑ خلیفہ راشد نا قول  ءِ کہ دنیا ٹی کفر نانظام چلینگ کیک ظلم انا آخا، مریم نواز پارے کہ کناگڑاس خیرخواک کنے مشورہ تسر کہ ننے قوم انا سجفوئی تمک، قوم انا مون آ گڑاس راستکی تے تخنگ خواوہ۔ اوپارے کہ ہرعدالتی فیصلہ غلط مننگ کیک ولے غلط فیصلہ غاتا تسلسل غلط ءِ۔ اوپارے کہ 2016 آن عدالتی فیصلہ غاتیان اسہ داستان اس مون آ بریک۔ اوپارے کہ عدالت آتا فیصلہ وخت اس ہم بانچھ مننگ مفک، اوفتا اثر دہائی تسکان رہینگک۔ بروک آ وخت اٹی اونا اثرآک پین زیات مریرہ۔ اوپارے کہ ادارہ سے نا توہین وخت اس ہم ادارہ غان پیشن آن مفک، ادارہ نا تہہ آن مریک، متنازعہ فیصلہ غاتیان عدلیہ نا توہین مریک، انصاف آ مبنی فیصلہ غااخس کہ تنقید کننگے او ہچ ءُ معنی اس تخپک۔ پنجاب اٹی وزیراعلیٰ نا گچینی مس ہراڑآ تحریک انصاف دیوال آتیان خسسا سپریم کورٹ رجسٹری برانچ آ ہنا وخت اس کہ پٹیشن داسکان تیار مسکہ و اونا انتظار ءِ کننگا۔ دا دا ملک اٹی انصاف نا حقیقت ءِ۔ سینیٹ نا گچین کاری تیٹی 6 وونٹ مسترد کننگا تو ہمووخت آ عدالتی موقف ئس کہ چیئر نا رولنگ چیلنج مننگ کپک ولے پنجاب اٹی مسلم لیگ (ق) نا سروک چوہدری شجاعت حسین نا مرضی نا برخلاف ہرافک وونٹ تسر اوفتا وونٹ ءِ عدالتی فیصلہ نا رداٹ مسترد کننگ آ ڈپٹی اسپیکر پنجاب ءِ بٹنگ انگا۔ قومی اسمبلی ٹی ڈپٹی اسپیکر قاسم سوری ءِ عدالت اٹ انت اکن بٹنگتو؟، مریم نواز پارے کہ جعلی وونٹ پک مننگ آن پد ہم او دونیم سال آن سپریم کورٹ آن حکم امتناعی آٹے۔ آئین شکنی آ صدر و ڈپٹی اسپیکر ءِ اسہ عدالت اس ہم بٹنگتو۔ اوپارے کہ پنجاب اسمبلی نا 25 باسک آتے پارٹی سروک نا منشا نا برخلاف وونٹ بٹنگ آ نابود گوندنگا و دا فیصلہ تننگا کہ اوفتا وونٹ شمار مفک۔ 95 درسد کانود دانک پاریر کہ دا فیصلہ آئین ءِ دُوارہ لکھنگ آنبار ءِ۔ دا25 باسک ءِ تحریک انصاف نا جھولی ٹی شاغنگا و داسہ مسلم لیگ ق نا 10 باسک آتے ہم ہمو فیصلہ غان چپ تحریک انصاف نا جھولی ٹی شاغنگا۔ مسلم لیگ (ن) نا باسک آک کم و پی ٹی آئی نا باسک آتے زیات کننگ ہراکان نا انصاف ءِ؟ مریم نواز پارے کہ پارٹی نا سروک ءِ ہرسا تینا ہی کروک آ فیصلہ غاتے بدل کننگک۔ اوپارے کہ پارٹی سروک اگہ نواز شریف مرے تو اونا برخلاف فیصلہ اقامہ غا کننگک و اوڑتون اوار پاننگک کہ پارٹی سرکڑدہ ئی آن اینک کننگک کہ پارٹی سروک کل گڑامریک۔ چوہدری شجاعت ہراکہ مسلم لیگ (ق) نا صدر ءِ اونا پرمان تیا سوج ہرفنگ انگ ءِ۔ عمران خان نا بابت آئین نا تشریح ءِ بدل کننگک۔ اوپارے کہ اگہ انصاف نا ترازو ءِ سہی کننگے تو پاکستان سہی مریک۔ خبر اف عدالت آک ٹرسٹی وزیراعلیٰ، بلیکلاڈ کشنری نا لوزآتے ہراکان اخذ کیرہ؟، حمزہ شہباز ءِ وزیراعلیٰ جوڑ مننگ آن پد کاریم کننگ کن ہلنگتو۔ شہباز شریف ہراتم آن وزیراعظم جوڑ مس، گیشتر عدالت آتیٹی ہُننگک۔ اوپارے کہ ننتون کروک آ نا انصافی تا بھلو لڑ اسے۔ مریم نواز پارے کہ اپریل 2022 اٹی ہراتم ننے حکومت ملا و اینو جولائی 2022 اٹی موازنہ کننگ مفک، زرگزران نا حالیت نا موازنہ 2017 غان مریک۔ اوپارے کہ عمران خان قوم انا ارب آ روپئی ملک ریاض ءِ تس۔ 2017 آن پد ملک انا ہندن حالیت مس کہ اینو اسکان سہی مننگ کتو۔ ہمووخت آ غٹ ٹک آک مثبت ئسر، اقامہ کون آ ملنڈآ نواز شریف ءِ کشنگا ہموتم آن ملک لوڈو کننگ ءِ و داسکان سہی مننگ اٹ بفننگ ءِ ، اووخت وٹس ایپ آ جے آئی ٹی جوڑ کننگا۔