کوئٹہ۔ 22 جولائی (اے پی پی) صوبائی ٹی بی پروگرام نا صوبائی کوآرڈنیٹر ڈاکٹر آصف بلوچ ضلع کیچ اکن ٹی بی وین ءِ ستاکڑزوک گوندسا پارینے کہ ٹی بی وین آن پد کیچ انا مر مر انگا علاقہ غاتیٹی ٹی بی نا ناجوڑ آتا پٹنگ، اوفتا تشخیص و درمان اٹ کمک رسینگک۔ داخیال آتا درشانی ءِ او جمعہ نادے آ ٹیچنگ ہسپتال تربت اٹی مرسی کور ٹیم انا کنڈآن ٹی بی وین نا بنائی دود آن تران کرسا کرے، داوخت آ صوبائی ڈپٹی کوآرڈی نیٹر ٹی بی پروگرام ڈاکٹر خرم بادینی ڈی ایچ او کیچ ڈاکٹر عبدالطیف دشتی، ڈائریکٹر ہیلتھ سروسز مکران ڈویژن ڈاکٹر میر یوسف خان، پی پی ایچ آئی نا ڈی ایس ایم حاجی خان بلوچ ، ٹی بی پروگرام کیچ انا کوآرڈی نیٹر ڈاکٹر موسیٰ بلوچ ، ڈبلیو ایچ او نا ڈاکٹر فاروق، ڈپٹی ڈی ایچ او ڈسٹرکٹ گوادر ڈاکٹر شاہنواز ، ای پی آئی کیچ انا ڈی ایس وی عبدالطیف بلوچ، ڈی ایف ایس ایس پی او امیر جان شاہنواز لیب ٹیکنیشن مرسی کور، محراب لال ایکسرے ٹیکنیشن مرسی کور و سول سوسائٹی نا ممبر عامر ہوت و ایلوفک ساڑی ئسر۔ صوبائی کوآرڈی نیٹر ڈاکٹر آصف بلوچ پارے کہ موبائل وین اٹ خلوک پوسکن آ ڈیجیٹل ایکسرہ نا کمک اٹ ٹی بی نا ممکنہ ناجوڑ آتا تشخیص ءِ کرفنگ مریک، دا وین نا کمک اٹ چندی علاقہ، ہسپتال ، تعلیمی ادارہ غاتون اوار چندی ہند آتیا ہنسا کیمپ آتا کمک اٹ الس نا ٹی بی نا مرض انا بابت سکریننگ کننگ مریک ہراڑآن ٹی بی نا ناجوڑآتا پٹنگ اٹ بھاز کمک رسینگک ۔ ڈاکٹر آصف شاہوانی نا پاننگ ئس کہ بلوچستان اٹی ٹی بی نا ناجوڑ آتا کچ اٹی ودکی نا غٹ آن بھلا سوب نیزگاری و شعور و آگہی نا کمتی ءِ۔ اوپارے کہ ٹی بی اسہ درمان نا قابل ءُ مرض اسے و دانا درمان ءِ مفت کننگک، ٹی بی ناناجوڑ آتا ٹیسٹ ءِ ہلسا دوائی اسکان غٹ آسراتی تے مفت فراوان کننگک۔ اوپارے کہ صوبائی ٹی بی کنٹرول پروگرام صوبہ غان ٹی بی نا مرض انا پورو چٹفنگ کن کوشست کننگ ءِ۔
