کوئٹہ ۔ 14 جولائی (اے پی پی) سینیٹر ثمینہ ممتاز زہری پارینے کہ پاکستان ہچ ءُ حالیت اسے ٹی ترندی اٹ ودوک آ آبادی ءِ سگنگ کپک، آبادی ٹی ودکی نا توننگ کن انقلابی گام گیج آتا گرج ءِ۔ داخیال آتا درشانی ءِ او آبادی نا جہانی دے انا وخت آ دود آن تران کرسا کرے۔ اوگڑتی نا درشانی ءِ کرسا پارینے کہ پاکستان نا آبادی ٹی پدریسہ ودکی مننگ ءِ و پاکستان دا ترند رفتار ودکی ءِ سگنگ کپک، ساڑی آبادی نا رداٹ ہم پاکستان اٹی وسیلہ غاتا بھاز کمتی ءِ و داوسیلہ غاتے اٹ پاکستان نا غٹ شاریک سہی وڑاٹ فائدہ ہرفپننگ ءُ۔ ترندی اٹ ودوک آ آبادی حکومت کن ہم اسہ بھلو چیلنج اسے ہراڑتون مون تننگ کن خصوصی گام گیج آتاگرج ءِ۔ اوپارے کہ ملک اٹی وسیلہ کم ءِ۔ آبادی ٹی ودکی آن انسانی جان جوڑی خاص وڑاٹ لمہ وچناناجان جوڑی تون اوار مخلوق نازرگزرانی و راجی زند آ ہم منفی اثر تمک ہرانا اثر مچ آ خاہوت آ تمک۔ آبادی نا جہانی دے انا وخت آ کلہو اٹی سینیٹر ثمینہ ممتاز زہری تینا بیان اٹی پارے کہ داوخت آ دنیا نا آبادی 8 ارب آن گدرینگانے۔ مچ آ دنیا ٹی ملک آک تینا دوئی وسیلہ غاتا رداٹ تعلقدار آبادی تے اولیت تننگ ءُ۔ حساب وکتاب نا رداٹ پاکستان رقبہ نا رداٹ دنیا نا 33 می بھلا ملک ءِ وخت اس کہ آبادی نا لحاظ اٹ پاکستان دنیا نا پنچ میکو بھلا ملک ءِ ہرا بھلا ویل آتا موجب ءِ انتئے کہ وسیلہ غاتا مقابلہ ٹی ویل زیات ءِ ہرانا سوب پدریسہ ترندی اٹ ودوک آ آبادی ءِ۔ اوپارے کہ ودوک آبادی، جان جوڑی، روزگار نا فراوانی ، تعلیم ، چاگڑدی بدلی و دیر انا چٹنگوک آ کوڑی و قومی سلامتی کن بھلو خطرہ اسے۔ اوپارے کہ الس ءِ آبادی ٹی ودکی نا کچ ءِ کم کننگ نا اہمیت نا بارواٹ شعور و آگاہی تننگ نا گرج ءِ و داڑکن غٹ مکتبہ فکر ءِ تینا تینا کڑد ءِ ادا کروئی مریک ہراٹی ننا مذہبی راہشون و میڈیا بھاز اہم رول اس ادا کننگ کیک۔ الس اٹ شعور تالان کننگ نا سوب آن جان جوڑی نا گچین خیال تخنگ، زرگزران ءِ سوگو و پائیدار راجی زند ءِ پک کننگ مریک۔
