کوئٹہ۔13جولائی (اے پی پی): بلوچستان ءِ سروزیر میر عبدالقدوس بزنجو ءَ گشتگ کہ صوبائی بجٹ ءِتہا امن ء ُ ایمن ءِ ھاترءَ بازیں فنڈے ایر کنگ بوتگ، بلو چستان ءِ ناشرکاری ءِ جنگ ءَ فرنٹ لائن صوبہ ءِ کرد اِنت ء ُ ما لوٹا ں کہ امنء ُایمنی ءِ حرچانی تہا بنجاہی حکومت ء ُ ایندگہ صوبہ ہم مئے بار بہر بہ کن اَنت۔ بنجاہی حکومت ءَ چہ بلوچستان ءَ را گیشیں دیمروئی فنڈز ءِ دزبندی کتگ مزن وزیر بلوچستان ءَ را باز ارزشت دیئگ ءَ اِنت ایشی ءَ چہ دلبڈی رسیت، ما بنجاہی ءِ کمک ءَ چہ بلوچستان ءِ دیمروئی ءِ عمل ءَ دیما براں۔ اے گپ آئی ءَ گوستگیں روچءَ روہتاکانی ایڈیٹرز آنی گوما گپ ء ُ تران کنان ءَ کتگ۔ سروزیر ءَ گشتگ کہ کوئٹہ ءِ نادراہ جاہ آں گہتری آرگ مئے اولی دلگوشی اِنت۔ نادراہ جاہ آں طبی سامان آنی سرکنگ ءِ ھاترءَ کروڑاں کلدار ءِ فنڈ ایر کنگ بوتگ۔ سروزیر ءَ گشتگ کہ شیخ زید نادراہ جاہ کوئٹہ ءَ گہتریں آسراتی است کہ آیاں چہ پائدگ چست کنان ءَ ڈاکٹر ء ُ طبی عملہ تعینات کنگ بوتگ ء ُ نادراہ جاہ آنی ڈاکٹر ء ُ طبی عملہ آناں یک گیشیں بنکی پگار ء ُ ایندگہ آسراتی دیئگ بوہگءَ اِنت ۔ سروزیر ءَگشتگ کہ سول نادراہ جاہ کوئٹہ ءِ ترز ءَ ایندگہ نادراہ جاہ آں ہم ٹراما سنیٹر جوڑ کنگ بنت ۔
