کوئٹہ۔ 10 جولائی (اے پی پی) قائم مقام گورنر بلوچستان میر جان محمد خان جمالی پارینے کہ بھلا عئید حضرت ابراہیم علیہ السلام نا اطاعت و حضرت اسماعیل علیہ السلام نا تسلیم و رضانا یات گاری اسے ، بھلا عئید انا وخت آ اوستہ محمد اٹی الس تون عئید ملنگ نا وخت آ گپ وتران کرسا اوپارے کہ اینو نادے ہمو عظیم شخصیت آک اطاعت و ایثار و قربانی نا بے مٹ ءُ درور اس جوڑ کریسر، دا عمل خالق کائنات ءِ ہندن پسند بس کہ اودے قیامت اسکان امت محمدی صلی اللہ علیہ و آلہ وسلم کن عبادت نا حیثیت اٹ لازم گوندا۔ قائم مقام گورنر نا پاننگ ئس کہ ای بھلا عئید انا وخت آ غٹ اہل وطن ءِ مبارکبادی ایتیوہ و اللہ تعالیٰ آن دعا کیوہ کہ نما غٹ انا زند اٹی داوڑنا خوشی تا وارخواہی تے وار وار برساکے۔ اوپارے کہ قربانی نا جوزہ اسہ عالمگیر حیثیت اس تخک ہر مسلمان تینا توفیق و وس انا رداٹ قربانی کیک ، دنیا ٹی اسہ قوم اس ہم ہمووخت اسکان اخلاقی سربلندی دوئی کننگ کپک ہراتم اسکان اوٹی ایثار و قربانی نا جوزہ مف، قربانی نا مسخت انسان نا تینا است خواہی تے بڑزکو مسخت آتا دوئی کننگ کن قربان کننگ ءِ۔ دا جوزہ انسان نا تہہ ٹی ہمو لائخی تے تالان کننگ نا ذریعہ جوڑ مریک ہرا آزمائشت اسے ٹی یا تکلیف نا وخت و حالیت اسے ٹی صبر و سگ انا کسر ءِ اختیار کننگ نا حوصلہ ایتک۔
