کوئٹہ۔ 24 جون (اے پی پی) بلوچستان نا 18 ضلع غاتیٹی پنچ دے ئی پولیو تور مہم 27 جون آ بناکیک وخت اس کہ کوئٹہ ٹی پولیو تور مہم ہفت دے چلینگک، داخیال آتا درشانی ءِ سیکرٹری جان جوڑی بلوچستان صالح محمد ناصر جمعہ نادے آ چلڈرن ہسپتال اٹی چناتے پولیو نا پڑی کنفنگ نا وخت آ میڈیا تون گپ وتران کرسا کرے۔ اوپارے کہ کوئٹہ ٹی پولیو تور مہم ہفت دے چلینگک وخت اس کہ ایلو 18 ضلع غاتیٹی انسداد پولیس مہم 5 دے چلینگک۔ اوپارے کہ مہم اٹی 12 لکھ آن زیات چناتے پولیو نا پڑی کنفنگک، مہم اٹی 4904 ٹیم ٹہیفنگانے۔ اوپارے کہ 27 جنوری 2021آن داتم اسکان ہچ ءُ پولیو کیس اس صوبہ ٹی رپورٹ متنے ہرااسہ سرسہبی اسے۔ اوغٹ لمہ و باوہ غاتیان خواست کرے کہ پولیو آن بچفنگ نا مہم اٹی پولیو ورکرآتون پبی کمک کیر و تینا چناتے پولیو ویکسین ضرور کنفر۔ پولیو نا پڑی کنفسا نن تینا آخبت نا جوڑ کروک آتے مدام معذوری آن رکھ تخنگ ءِ ، مہم اٹی غٹ عملہ ءِ فول پروف سیکورٹی تننگک ہراڑآ بلوچستان لیویز، پولیس و ایف سی نا ورناتعینات مریک ہراضلع غاتیٹی پولیو مہم نا بناءِ کننگک اوفتے ٹی کوئٹہ، پشین ، قلعہ عبداللہ ، چمن، جعفر آباد، نصیر آباد، لورالائی ، خضدار، قلعہ سیف اللہ، مستونگ، شیرانی، ژوب، موسیٰ خیل، صحبت پور ، نوشکی، ڈیرہ بگٹی ، چاغی و لسبیلہ اوار ءُ۔
