اسلام آباد۔ 16 جون (اے پی پی) وزیرخارجہ بلاول بھٹو زرداری پارینے کہ پاکستان ءِ آخبت اٹ بڑزکو ہند اس ترفنگ کن کوشست کننگ اُن، ملک انا خارجہ پالیسی جیو پولیٹکل اثر آتیان براہ راست زہمی مننگ ءِ ، داحالیت آتیٹی ننے تینا جغرافیائی ہند ءِ کاریم اٹ اتسا گچین ءُ وارخواہی پٹوئی مریک، پاکستان ہندن ءُ ڈیہہ سے ٹی ءِ ہراڑے دنیا ٹی مروک آ بدلی براہ راست اثرانداز مریک۔ داخیال آتا درشانی ءِ او پنچ شنبے نادے آ داڑے انسٹی ٹیوٹ آف سٹریٹجک سٹیڈیز نا 49 می یوم تاسیس نا وخت آ اڈ ہلوک آ دود آن تران کرسا کرے۔ وزیرخارجہ پارے کہ نن بطور قوم پاکستان ءِ گچین پوزیشن اٹ اتوئی ءِ ، ننا چین اتون بھاز سوگو تعلقداری ءِ، سی پیک آن ڈیہہ ٹی شونداری نا پوسکن ءُ کسر ملنگک، اقتصادی و سفارتی کہول آ نن تون پوٹیشنل ساڑی ءِ۔ اوپارے کہ پاکستان مستین اٹ امریکہ و چین نا نیام اٹ سفارتی تعلقداری تا جوڑ کننگ اٹ اہم کڑد ادا کرے، پاکستان داسہ ہم جہانی واکدارآتا نیام اٹ پول انا کڑد ءِ ادا کننگ کیک۔ بلاول بھٹو زرداری پارے کہ ننامخلوق اٹ داخہ لائخی ارے کہ او دنیا ٹی ہرجاگہ غا کاریم کننگ کیرہ، ننا تینا ورناتیکن شونداری نا وارخواہی ودی کننگ نا گرج ءِ۔ اوپارے کہ خارجہ پالیسی نا براہ راست اثر ہر پاکستانی نا زند آ مرتب مریک، ننےدا سجفنگ نا گرج ءِ کہ نن دا وخت آ ہراڑے سلوک اُن، ورناتے مثبت سرجزآتیٹی اختہ کننگ کن کاریم کننگ اُن۔ وزیرخارجہ بلاول بھٹو زرداری پارے کہ انسٹی ٹیوٹ آف اسٹریٹجک سٹیڈیز نا یوم تاسیس نا دود اٹ بشخ ہلنگ اوڑکن شرفمندی اسے انتئے کہ داادارہ نا بنداو ءِ اونا پیرہ مسکوہی وزیراعظم شہید ذوالفقار علی بھٹو تخاسس۔ اوپارے کہ وزارت خارجہ انسٹی ٹیوٹ اتون خڑکی کمکاری برجا تخک ہرانا مسخت ملک انا خارجہ پالیسی ءِ گچین کننگ ءِ۔ اوپارے کہ ننے پاکستان نا الس ءِ دنیا ٹی مروک آ بدلی تیان معلومدار تخنگ و تینا موقف ءِ تالان کننگ نا گرج ءِ۔ وزیرخارجہ بلاول بھٹو زرداری بھارت تون جھیڑہ غاتا ذکر ءِ کرسا پارے کہ بھارتی حکومت 5 اگست 2019 آ تینا اسہ کنڈی گام گیج آتا کمک اٹ کشمیر نا جہانی کہول آ امنا مروک متنازعہ حیثیت ءِ بدل کننگ نا کوشست کرے۔ اوپارے کہ بھارت تینا غیرکانودی کوزہ گیری ٹی جموں وکشمیر اٹی مسلم گیشتری ءِ اقلیت اٹ بدل کننگ نا گام گیج کننگ ءِ وخت اس کہ مئی ٹی حد بندی کمیشن نا گام دانا اسہ کڑی اسے۔ وزیرخارجہ پارے کہ بھارت نا ساڑی حکومت ہندو توا ایجنڈآ سرگرم ءِ ، اسلاموفوبیا و بی جے پی لیڈر آتا ساڑی آ ریمارکس آن سنگین ءُ چاگڑد اس ودی مننگ ءِ و بھار ت اٹ ہندو توا نا نظریہ ءِ بالادست جوڑ کننگ انگ ءِ۔ اوپارے کہ پاکستان نا ساڑی حکومت ءِ ویل آک تدوک آ حکومت نا میرات اٹ رسینگانو ہرافتے تون مون تننگ کن حکومت پبی گام گیج کننگ ءِ۔
