شیرانی۔ 16 جون (اے پی پی) ڈپٹی کمشنر شیرانی اعجاز احمد جعفر نا کماشی ٹی ضلعی رابطہ و ریویو کمیٹی نا دیوان ۔ دیوان اٹی ایف سی نا کمامدار ، ڈسٹرکٹ ایجوکیشن آفیسر تازہ خان ناصر ایس پی عبدالحق بلوچ پرنسپل انٹرکالج مانی خواہ محمد ہاشم شیرانی سیاسی جماعت آتا عہدیدار آک بشخ ہلکر۔ دیوان اٹی شیرانی نا تعلیم، جان جوڑی و ایلو بشخ آتے مون تروک ویل و ایسر نا بابت سرجم جاچ ءِ ہلنگا۔ دیوان اٹ پاننگاکہ تعلیم و جان جوڑی نا بشخ آتے تمبہ نا حیثیت دوئی ءِ ہنداخاطرآن تعلیم و جان جوڑی نا بشخ آتا فعالی و گچینی آ ہچ وڑنا سمجھوتہ کننگپک محکمہ تعلیم و جان جوڑی نا کارکڑد ءِ ہُننگ کن تعلقدار کمامدار آک غٹ اسکول و جان جوڑی ہند آتا دورہ ءِ کرسا بروک آ دیوان اٹی رپورٹ اس پیش کیرہ، ہرادے مون آ تخسا فیصلہ کننگک، غیرحاضری نا مرتکب ملازم آتا برخلاف سخت کارروائی کننگک، ڈیوالئی کروک آ ملازم آتے معطل و ملازمت آن برطرف کننگک ، دیوان اٹی پاننگاکہ ورناک ملک و قوم انا نہادی سرمایہ ءُ ورناتے مثبت سرجزآتا وارخواہی تا فراوانی ءِ پک کننگک تانکہ ورناتے مثبت سرجز آتیٹی بشخ ہلنگ نا وارخواہی دوبننگ کے۔
