اسلام آباد۔ 20مئی (اے پی پی) پارلیمانی سیکرٹری مریم اورنگزیب پارینے کہ سپریم کورٹ آن ارجنٹینا پارک انا جاگہ غا پولی کلینک ہسپتال ئِ ودیکی تننگ نا حکم امتناعی واگزار کرفنگانے، دا جاگہ غا 1100 کٹ آتا پنچ مزلہ پوسکن ئُ ہسپتال اس جوڑ کننگک۔ جمعہ آ قومی اسمبلی نا دیوان اٹی وقفہ سوج آتا وخت ساجدہ بیگم نا ضمنی سوج انا ورندی ٹی مریم اورنگزیب پارےکہ ارجنٹینا پارک انا جاگہ غا پولی کلینک ہسپتال ئِ ودیکی تننگ نا فیصلہ 2013ءٹی کننگاسس واہم عدالت نا کنڈآن اوڑآ حکم امتناعی دوئی کننگا، داسا سپریم کورٹ آن دا واگزار کرفنگانے۔ ارجنٹینا پارک آ پنچ مزلہ ماڑی ٹی 1100 کٹ آتا ہسپتال اس جوڑ کننگک۔ ساجدہ بیگم نا ضمنی سوج اناورندی ٹی پارلیمانی سیکرٹری پارے کہ بنجائی دارالحکومت نا ہر چار آ سرکاری ہسپتال آتا ایمرجنسی ٹی کبین آن کبین دوئی مفت تننگک۔ پولی کلینک نا ایمرجنسی و ڈسپنسری ئِ ودیکی تننگ انگ ئِ۔ میجر (ر) طاہر اقبال نا ضمنی سوج انا ورندی ٹی مریم اورنگزیب پارے کہ پمز اٹی پرائم کیئر نا ایمرجنسی آ بھاز دباﺅ ئِ۔ دا دباﺅ ئِ کم کننگ کن دیہی جان جوڑی نا بنجاتے اپ گریڈ کننگ نا ڈٹ بندی کننگ انگ ئِ۔
