اسپیکر و ڈپٹی اسپیکر قومی اسمبلی نا چنکا عئید انا وخت آ امت مسلمہ و قوم ءِ مبارکباد

اسلام آباد۔ 02 مئی (اے پی پی) اسپیکر قومی اسمبلی راجہ پرویز اشرف و ڈپٹی اسپیکر زاہد اکرم خان درانی چنکا عئید انا خوشی تیان پُر وخت آ مچ آ امت مسلمہ و قوم ءِ مبارکباد پیش کرینے۔ تینا عئید کلہو اٹی اسپیکر قومی اسمبلی پارے کہ او دا خوشی نا وخت آ تینا ہم وطن بزرگ ،ایلم، ایڑھ و چناتے عئید انا مبارکبادی پیش کیک۔ اوپارے کہ نن عئید انا داوخت آ خدانا شکر ءِ ادا کین ہراننے روچہ نا تُو اٹی روچہ تخنگ، عبادت کننگ و ضرورت مند آتا کمک ءِ کننگ نا موقع اس تس۔ راجہ پرویز اشرف پارے کہ عئید انا دے ننا غٹ اکن خوشی تے ایسونے ولے اونا حقی خوشی ہمووخت آ دوئی مریک ہراتم نن تینا غریب و نیامی تپہ غاتا خیال ءِ تخن و اوفتے تینا خوشی تیٹی اوار کین۔ اوپارے کہ اسہ سوگو اسلامی آسودہی راج اسے نا ٹہیفنگ کن راجی ناانصافی تا چٹفنگ و ہم گرنچی و ایلمی نا مون آ دننگ کن کڑد ادا کننگ نا گرج ءِ۔ داوخت آ ڈپٹی اسپیکر زاہد اکرم خان درانی پارے کہ چنکاعئید انا دے ہراڑے ننکن خوشی اتیک بریک ہموڑے ننے دا احساس ءِ ہم ترفک کہ نن داخوشی نا وخت آ تینا غریب و نادار ایلم تے یات تخن۔ اوپارے کہ اینو نا دے اللہ تعالیٰ نا حضور سجدہ شکر کننگ نادے ءِ ہرانن روچہ نا تُو اٹی روچہ تخنگ نا توفیق تس۔ اوپارے کہ عئید انا اجتماع تیا ننے قومی یکجہتی ءِ مون آ دننگ نا گرج ءِ۔ اوپارے کہ ننے اسہ ایلو نا سیاسی اختلاف آتے گیرام کرسا ملک انا زرگزرانی شونداری و شونہالی کن اواری اٹ مون آ ہِننگ نا گرج ءِ۔ اوپارے کہ ساڑی جمہوری حکومت ملکی ویل آتا ایسری کن غٹ سٹیک ہولڈر آتون اواری اٹ کاریم کننگ خواہک۔