چیئرمین سینیٹ نا مسلمانان عالم و الس ءِ چنکا عئید نا خوشی تا وخت آ مبارکباد

اسلام آباد۔ 02 مئی (اے پی پی) چیئرمین سینیٹ محمد صادق سنجرانی مسلمانان عالم اسلام و خاص وڑاٹ پاکستانی تے چنکا عئید انا بابرکت و خوشی تا وخت آ است اٹ مبارکبادی ترسا پارینے کہ روچہ نا تُو انا عبادت قوم اٹی تقویٰ ، نظم و ضبط و سگ و سینہ نا خوبی تے مون آ دیک۔ سینیٹ سیکرٹریٹ نا رداٹ چنکا عئید انا وخت آ تینا کلہو اٹی چیئرمین سینیٹ پارے کہ غٹ اہل اسلام ہندا جوش و جوزہ نا عملی درشانی ءِ کرسا تینا دنیاوی و آخرت نا زند ءِ سرسہب کیر۔ اوپارے کہ روچہ نا تُو مسلمان تیکن اللہ تبارک و تعالیٰ نا کنڈآن اسہ عظیم  ءُ ٹیکی اسے ہرانا فیض و برکت آتیان فائدہ ہرفسا آخرت نا سرسہبی دوئی کننگ مریک۔ اللہ تعالیٰ غٹ مسلمان تا عبادت و دعا تے قبول فرمائفک۔ اوپارے کہ چنکا عئید انا دے روچہ مبارک نا بابت یوم تکمیل رحمت الٰہی و یوم تشکر ءِ، اللہ تعالیٰ نا بے پایاں نعمت و رحمت آتا خواست ءِ کہ نن قادر مطلق نا پرمان تے مون آ تخسا تینا دے و نن ءِ روشنائی کین انتئے کہ ہندا صراط مستقیم ءِ ہراڑ ہنسا نن دنیا و آخرت نا سرسہبی دوئی کننگ کینہ۔ چیئرمین سینیٹ پارے کہ چنکا عئید امن و  مہرومریبت تون خوشی تے بشخنگ نا رغامک وننے ملک ءِ امن  نا وت اس جوڑ کننگ کن اسیجا لائحہ عمل اس اختیار کروئی مریک۔ اوپارے کہ چنکا عئید مسلم دنیا کن اہم ءُ دے انا حیثیت تخک، مسلم امہ نا ویل آک اسیجائی و اوفتا ایسر ہم اسیجائی حکمت عملی ءِ۔ چنکا عئید انا رداٹ ننے تین پہ تینی اختلاف آتے است آن درسا ملکی شونداری و شونہالی کن مون آ ہنوئی مریک۔ ڈپٹی چیئرمین سینیٹ  مرزامحمد آفریدی ہم قوم ءِ چنکا عئید انا خوشی تیان پُر وخت آ مبارکباد پیش کرسا اللہ تبارک و تعالیٰ آن دعا کرینے کہ غٹ مسلمان تا روچہ نا تُو اٹی عبادت آتے قبول کے۔