پاک برطانیہ تین پہ تینی واپار ءِ پین ودفنگ نا گرج ءِ، میاں کاشف اشفاق

اسلام آباد۔ 02 مئی (اے پی پی) برطانیہ پاکستان بزنس کونسل ہڑتوم آ کنڈآتا واپار ءِ پین ودفنگ و بے سلنگ آن درملکی زرکاری نا دمدستی گرج آ زور شاغانے۔ برطانیہ پاکستان بزنسل کونسل نا چیئرمین میاں کاشف اشفاق برطانیہ ٹی رہینگوک آ پاکستانی زرکار و پاکستان برٹش فرینڈ شپ کونسل نارتھ نا صدر محمد ارباب خان نا کماشی ٹی ڈل اتون گپ وتران کرسا پارے کہ پاکستان نا برطانیہ تون دیرینہ تاریخی تعلقداری ءِ ہرافتے پین سوگو کننگ نا گرج ءِ۔ اوگیشتر اقتصادی ایجنڈا و حکومت نا اولیت آتا ذکر ءِ کرسا پارے کہ اونا بنداوی مسخت زرگزرانی و مالی سوگو ءِ پک کننگ ءِ ہرا زرگزرانی بحالی و اقتصادی شونداری کن بھاز المی ءِ۔ اوپارے کہ ہڑتوم آ ملک آتا نیام اٹ گچین اقتصادی و کثیر جہتی تعلقداری ءِ  ہرا بروک آدے تیٹی پین سوگو مریک۔ میاں کاشف اشفاق پارے کہ پاکستان درملکی زرکاری نا گیشتر وارخواہی و گچین آسراتی پیکج پیش کیک۔ اوپاکستان و برطانیہ نا زرکار آتون اسیجامیٹنگ نا اڈتننگ نا گرج آ زور شاغا و پاکستانی برآمد کروک آ تے پارے کہ او برطانوی منڈی تیٹی رسینگ دوئی کیر و برطانوی پوریاگرآتون خڑکی رابطہ ءِ استوار کیر۔ اواومیت ظاہر کرے کہ برطانوی ڈل انا راہشون محمد ارباب خان تینا ٹیم اتون سخت خواری کرسا پاکستان اٹ پین زرکاری اتیک و برطانیہ ءِ پاکستانی برآمد آتا مون آ دننگ اٹ کمک فراوان کیک۔ محمد ارباب خان میاں کاشف اشفاق ءِ برطانیہ نا دورہ نا سلہ خلک وپارے کہ او برطانوی زرکار آتون اونا ون آن ون اوڑدہی نا بست وبند ءِ کے۔