مچ آ ملک اٹی چنکا عئید ءِ (اینو) مذہبی جم وجوش اٹ اڈتننگک، اسلام آباد اٹی عئید انا نماز نا غٹ آن بھلا اجتماع فیصل مسجد اٹی مریک

اسلام آباد۔ 02 مئی (اے پی پی) مچ آ ملک اٹی چنکا عئید ءِ (اینو) سے شنبے نادے آ مذہبی جم وجوش اٹ اڈتننگک، بنجائی دارالحکومت اسلام آباد اٹی عئید انا نماز نا غٹ آن بھلا اجتماع فیصل مسجد اٹی مریک۔ صوبائی دارالحکومت آتیٹی ہم عئید گاہ و جامع مسجد آتیٹی عئید انا نماز نا بھلا اجتماع مریک۔ لاہور اٹی عئید انا نماز نا غٹ آن بھلا اجتماع تاریخی بادشاہی مسجد اٹی مریک، کراچی و کوئٹہ تون اوار ملک انا غٹ شار و خلق آتیٹی چنکا عئید انا اجتماع تیٹی ملک انا سالمیت ، شونداری و بقاء کن دعا کننگک وخت اس کہ خطیب حضرت آک و آئمہ کرامک عئید انا نماز نا خطبہ غاتیٹی مسجد نبوی ٹی پیش بروک آ است ہسون واقعہ نا مذمت ءِ کیرہ۔ آزاد کشمیر و گلگت بلتستان تون اوار اوار مقبوضہ کشمیر اٹی ہم چنکا عئید ءِ روایتی جم و جوش اٹ اڈتننگک۔ مرکزی رویت ہلال کمیٹی نا پڑو نا رداٹ چنکا عئید ءِ سے شنبے نادے آ اڈتننگک، یک شنبے نادے آ مچ آپاکستان اٹی شوال 1443 ھ نا نوک خننگتو ہرانا رداٹ دوشنبے نادے آ سی ءَ میکو روچہ ئسک۔ مچ آ ملک اٹی اسہ جاگہ سے آن ہم شوال نا نوک ءِ خننگ نا شرعی شاہدی دوئی مفننگ آن پد مرکزی روایت ہلال کمیٹی نا چیئرمین مولانا محمد عبدالخبیر آزاد پڑو کریسس کہ چنکا عئید سے شنبے نادے آ مریک۔ مقبوضہ کشمیر، بھارت ، بنگلہ دیش و سرکاری لنکا ٹی ہم چنکا عئید ءِ سے شنبے ناد ے آ اڈتننگ انگ ءِ۔ داکان چپ خیبرپختونخوا حکومت صوبہ ٹی دوشنبے نادے آ چنکا عئید ءِ اڈ تننگ نا پڑو کرے۔ داحالیت آتا رداٹ صوبائی دارالحکومت پشاور تون اوار صوبہ ناگڑاس علاقہ غاتیٹی دوشبے نادے آ چنکا عئید ءِ اڈتننگا۔