وزیراعظم شہبازشریف نا کماشی ٹی پاکستان کڈنی اینڈ لیور انسٹیٹیوٹ آ لاہور اٹی جاچ دیوان

اسلام آباد۔ 02 مئی (اے پی پی) وزیراعظم محمد شہباز شریف پارینے کہ نیزگار بندغ آتے جان جوڑی نا آب اٹ آسراتی تا مفت فراوانی حکومت نا اولیت آتیٹی اوار ءِ ، نادار و مفلس تپہ ءِ چکار تفننگ نا سوچ ءِ بدل کننگ و اوفتا خذمت ءِ اولیت آتیٹی سرفہرست تخنگ نا گرج ءِ، پاکستانی کڈنی اینڈ لیور انسٹیٹیوٹ (پی کے ایل آئی) ءِ ٹرسٹ جوڑ کننگے و نرسنگ یونیورسٹی نا ڈٹ ءِ زوت پورو کننگے۔ وزیر اعظم آفس نا کنڈآن دوشنبے نادے آ جاری بیان نا رداٹ وزیراعظم داخیال آتا درشانی ءِ  پاکستان کڈنی اینڈ لیور انسٹیٹیوٹ آ لاہور اٹی جاچ دیوان نا کماشی ءِ کرسا کرے۔ دیوان اٹی وزیراعظم ءِ پی کے ایل آئی نا انتظامی امور آ سرجمی اٹ حوال تننگا۔ وزیراعظم ءِ پاننگاکہ تدوک آ سال 290 کڈنی ٹرانسپلانٹ و 190 لیور ٹرانسپلانٹ کننگا، ناجوڑ آتیان بیرہ 17 درسد ءِ مفت درمان نا آسراتی فراوان کننگا۔ وزیراعظم ءِ ہسپتال اتون نرسنگ یونیورسٹی نا ڈٹ آ پیش رفت آن ہم معلومدار کننگا۔ وزیراعظم پی کے ایل آئی نا ڈٹ انا پوروی ٹی ڈیوالئی کننگ آ است ہسونی نا درشانی ءِ کرسا پی کے ایل آئی ٹی ناجوڑ آتے تروک آ ساڑی آسراتی تے است جم مفروک گوندا۔ وزیراعظم ہسپتال اٹی آسراتی تے جہانی آب انا رداٹ جوڑ کننگ و کم آن کم پنجا درسد نیزگار ناجوڑ آتے مفت درمان فراوان کننگ نا پارت جاری کرے۔ وزیراعظم محمد شہباز شریف پارے کہ پی کے ایل آئی نا مسخت مچ آ ملک انا نیزگار و نادرا مخلوق ءِ مفت ٹرانسپلانٹ نا آسراتی فراوان کننگ ئسک تانکہ اوفتے بھلو زراس خڑچ کرسا درمان کن ایلو ملک آتیان ہنوئی تمپ۔ وزیراعظم پی کے ای آئی ءِ مالی وڑاٹ وتواجہ جوڑ کننگ کن چیف سیکرٹری پنجاب ءِ پارت کرے کہ او پورو حکمت عملی اس شین ترسا مسہ دے اٹی پیش کے۔ وزیراعظم پارت کرے کہ مالی سوب آتا سوب آن ہم ناجوڑ آتے درمان آن محروم تخنگپ، جان جوڑی نا آب اٹ آسراتی تا دوئی کننگ اٹ ملک انا نیزگار بندغ آتے ویل آک ءُ، اوفتے جہانی آب انا آسراتی تا مفت فراوانی حکومت نا اولیت آتیٹی اوار ءِ۔ وزیراعظم نادار و مفلس تپہ غا چکار کپننگ نا سوچ ءِ بدل کننگ و اوفتا خذمت ءِ اولیت آتیٹی سرفہرست تخنگ نا گرج آ زور شاغا ۔ وزیراعظم پی کے ایل آئی ءِ ٹرسٹ جوڑ کننگ نا پارت کرسا پارے کہ نرسنگ یونیورسٹی نا ڈٹ ءِ زوت پورو کننگے و پی کے ایل آئی نا سفائی ءِ جہانی آب ان ارداٹ جوڑ کننگ کن اگہ گرج پیش برے تو سفائی نا نظام ءِ آوٹ سورس کننگے۔ دیوان اٹی خواجہ سلمان رفیق، خواجہ عمران نذیر، چیف سیکرٹری پنجاب، پنجاب نا ہیلتھ سیکرٹری، تعلقدار بڑزکو کمامدار و پی کے ایل آئی نا عہدیدار آک بشخ ہلکر۔