وزیراعظم محمد شہباز شریف نا ابوظہبی نا ولی عہد تون اوڑدہی

اسلام آباد۔ 02 مئی (اے پی پی) وزیراعظم محمد شہباز شریف ابوظہبی نا ولی عہد و متحدہ عرب امارات (یو۔اے۔ای) نا سلہہ بند فوج انا ڈپٹی سپریم کمانڈر شیخ محمد بن زاید آل نہیان تون ابوظہبی ٹی اوڑدہی کرے۔ وزیراعظم آفس نا کنڈآن جاری بیان نا رداٹ کابینہ نا اہم آ باسک آک و بڑزکو کمامدار آک ہم اوڑدہی ٹی وزیراعظم تون اوار ئسر۔ ولی عہد محمد شہباز شریف ءِ وزیراعظم پاکستان نا منصب ءِ سنبھالنگ آ مبارکباد پیش کرے و دا زمواری تیٹی عظیم سرسہبی کن نیک است خواہی نا درشانی ءِ کرے۔ اوپاکستان نا الس نا شونداری و شونہالی کن خیرخواہی و نیک است خواہی تا ہم درشانی ءِ کرے۔ ہڑتوم آ راہشونک چندی ہڑتوم آ کنڈآتا، علاقائی و جہانی امور آ سرجمی اٹ سلابت کریر۔ وزیراعظم ’یو۔اے۔ای‘ نا بانی و اولیکو صدر شیخ زاید بن سلطان آل نہیان نا بصیرت افروز سرکڑدہ ئی و پاکستان و ’یو۔اے۔ای‘ نا سنگتی نا سوگو بنداو اس جوڑ کننگ نا کوشست آتے خراج عقیدت پیش کرے۔ اوایماندار شیخ زاید بن سلطان آل نہیان نا بصیرت ءِ مون آ تخسا ہڑتوم آ ملک آتا تین پہ تینی فائدہ ٹی تعلقداری تے پین پکا و سوگو کننگ نا تینا حکومت نا عزم انا درشانی ءِ کرے۔ ’یو۔اے۔ای‘ نا تاریخ ساز شونداری و ترند آ اولین 50 سال انا حوالہ ءِ ترسا وزیراعظم ’یو۔اے۔ای‘ نا سرکڑدہ و الس ءِ مبارکبادی پیش کرے و بروک آ دہائی تیٹی پین سرسہبی و کامرانی تیکن نیک است خواہی نا درشانی ءِ کرے۔ وزیراعظم دوبئی جہانی نمائش 2020 نا سرسہب اڈتننگ آ ’یو۔اے۔ای‘ نا سرکڑدہ و نمائش اڈ تروک آ ٹیم ءِ مبارکبادی تس ہرا پبی و شاندار سرسہبی تیان ہمکنار مس۔ وزیراعظم محمد شہباز شریف ہڑتوم آ کنڈآتا کہول و جہانی فورم تیا پاکستان نا متکن آ و پبی مخ تفی آ یو۔اے۔ای ءِ خراج تحسین پیش کرے۔ وزیراعظم خاص وڑاٹ ’یو۔اے۔ای‘ پاکستان اعانت پروگرام نا رداٹ پاکستان اٹی انسانی خذمت و آسودہی نا ڈٹ آتا بناکننگ و کورونا دین انا جہانی دین اٹی یو۔اے۔ای نا کنڈآن تروک آ اہم امداد نا ستاءِ کرے۔ او1.7 ملین پاکستانی تا عزت و شرف اٹ مہمانداری ءِ کننگ آ یو۔اے۔ای نا منت واری ءِ ہرفے ہرا پاکستان و  یو۔اے۔ای نا نیام اٹ نئے بیرہ پول انا کڑد ءِ ادا کننگ ءُ بلکن پاکستان نا گمر ہم اریر۔ شیخ محمد زاہد آل نہیان نا مچ آ دنیا غان پولیو چٹفنگ نا نیک گام ءِ تالان کرسا وزیراعظم شہباز شریف داموذی  مرض انا چٹفنگ کن جہانی کوشست آتا پبی مخ تفی ٹی متحدہ عرب امارات نا کڑد ءِ خراج تحسین پیش کرے۔ چندی بشخ آتیٹی ہڑتوم آ کنڈآتا کمکاری نا جاچ ءِ ہلسا ہڑتوم آ راہشونک زرکاری، زرگزرانی شونداری، توانائی، پنجر و کشت وکشار نا بشخ آتیٹی شریدساری ٹہیفنگ و کمکاری ءِ ترند کننگ آ خصوصی چکار کرسا واپار و زرگزرانی تعلقداری تے پین سوگو کننگ نا عزم ظاہر کریر۔ ولی عہد ہڑتوم آ ملک آتا بروک آ چین تا فائدہ ٹی خڑکی ہڑتوم آ کنڈآتا برادرانہ تعلقداری تے سوگو کننگ کن گچین کوشست کننگ نا بابت وزیراعظم ءِ باور کرفے۔ او’’یواے۔ای، ٹی رہینگوک آ پاکستانی تا کنڈآن ’یو۔اے۔ای‘ نا شونداری و شونہالی ٹی تعمیری کڑد انا اعتراف ءِ کرسا اوفتا ستا ءِ کرے وپارے کہ پاکستانی ہمووخت داڑے ئسر ہراتم ایلو باتی تا داڑے کچ اٹ ساڑی گری و کوشست ئسر۔ اوپارے کہ پاکستان و ’یو۔اے۔ای‘ ہر مشکل ساہت اٹ اسہ ایلو تون تفینو و آخبت اٹ ہم اسہ ایلو نا کمک ءِ برجاتخرہ۔ اوالسی آسودہی کن ہڑتوم آ ایلم قوم تا نیام اٹ رابطہ غاتا سوگوی نا اہمیت آ زور شاغا۔ ہڑتوم آ راہشونک علاقائی و جہانی اہمیت نا امور آ گپ وتران کریر، تین پہ تینی فائدہ نا غٹ امور و اقوام متحدہ ، او۔آئی۔سی ، تون اوار کثیر القومی فورم تیا شریداری عمل اٹ موقف اختیار کننگ کن آخبتی رابطہ ءِ برقرار تخنگ نا فیصلہ کننگا۔ پاکستان و متحدہ عرب امارات نا نیام اٹ تین پہ تینی پت، ہم گرنچی و خڑکی کمکاری آ مبنی تاریخی دیرینہ برادرانہ تعلقداری استوار ءِ۔ ہندا تُو وزارت عظمیٰ نا منصب ءِ سنبھالنگ آن پد وزیراعظم محمد شہباز شریف نا متحدہ عرب امارات نا دا اولیکو دورہ ئسک۔