وزیراعظم شہباز شریف نا دورہ سعودی عرب نا ایسر آ جاری اسیجائی اعلامیہ

جدہ۔ 01 مئی (اے پی پی) پاکستان و سعودی عرب سلامتی و سوگوی ، تشدد، انتہاپسندی، دہشت گردی نا چٹفنگ، سیوت نا مون آ دننگ ، ڈیہہ نا ملک آتا وتواجہی و اوفتا جغرافیائی سالمیت نا مخ تفی نا عزم انا درشانی ءِ کرینو، سعودی عرب ، پاکستان و اونا زرگزران نا گچینی کن پدریسہ مخ تفی ءِ برجاتخک، سعود ی عرب مرکزی بینک اٹی جمع کرفوک آ مسہ ارب ڈالر نا مد اٹی ودکی و اوفتے ٹی ودکی، پیٹرولیم مصنوعات آتا فنانسنگ ءِ پین ودفنگ نا گمان تے پٹنگ و زرگزرانی پنجر نا اصلاحات اٹ کمک کیک، ہڑتوم آ ملک آک ڈیہہ ٹی امن و سلامتی کن پاکستان وبھارت نا نیام اٹ جموں و کشمیر نا تنازعہ  تون اوار غٹ ویل آتا گپ وتران نا کمک اٹ ایسر کننگ نا گرج آ زور شاغار، ہڑتوم آ ملک آک روس ویوکرائن نا تنازع نا سیاسی تصفیہ و تنکی نا چٹفنگ نا اومیت ظاہر کرسا سلامتی کونسل نا قرارداد آتا رداٹ یمن تنکی نا جامع سیاسی ایسر نا گام گیج، فلسطین نا ویل انا تعلقدار قرارداد و عرب امن گام انا رداٹ جامع و ساف ایسر، شام اٹی علاقائی مداخلت ءِ محدود کننگ و اوغانستان نا گل زمین ءِ دہشت گرد پڑک آتیکن رکھ پناہ نا وڑاٹ کاریم اٹ اتنگ آن بچفنگ نا گرج آ زور شاغار۔ یک شنبے نادے آ وزیراعظم محمد شہباز شریف نا مسہ دے ئی سرکاری دورہ سعودی عرب نا ایسر آ جاری کروک اسیجائی علامیہ ٹی پاننگانے کہ وزیراعظم پاکستان محمد شہباز شریف سعودی عرب و اسلامی جمہوریہ پاکستان نا نیام اٹ استوار خڑکی برادرانہ تعلقداری تا رداٹ 28 آن 30 اپریل 2022 اسکان سعودی عرب نا دورہ ءِ کرے۔ سعودی عرب نا ولی عہد و نائب وزیراعظم شہزاد محمد بن سلمان بن عبدالعزیز آل سعود جدہ ٹی وزیراعظم ءِ بخیر کرے۔ ہڑتوم آ کنڈآتیٹی باضابطہ سرکاری اوڑدہی مس ہراٹی ہڑتوم آ ملک آتا نیام اٹ استوار تاریخی تعلقداری و غٹ بشخ آتیٹی خڑکی کمکاری نا جاچ ءِ ہلنگا و غٹ بشخ آتیٹی تعلقداری تے پین سوگو کننگ نا وڑوڈول آتیا سجفنگا۔ ہڑتوم آ کنڈآتا تعلقداری تا رداٹ ہڑتوم آ کنڈاک سعودی پاکستانی سپریم کوآرڈنیشن کونسل نا کمک اٹ امور کار ءِ سوگو کننگ، ہڑتوم آ برادر ملک آتا نیام اٹ واپاری ہن و بر ءِ زیات کننگ و ہڑتوم آ ملک آتا نجی بشخ آتا نیام اٹ رابطہ و گپ وتران ءِ ودفنگ نا اہمیت آ زور شاغار تانکہ واپار و زرکاری نا وارخواہی تے حقی و عملی شریداری ٹی بدل کننگے۔ اسیجائی اعلامیہ ٹی پاننگانے کہ سعودی عرب دا عزم انا درشانی ءِ کرے کہ او پاکستان و اونا زرگزران نا پدریسہ مخ تفی ءِ برجاتخک۔ داگپ وتران اٹی مرکزی بینک اٹی جمع کرفوک 3 ارب امریکی ڈالر نا مد اٹی ودکی نا کمک اٹ اوفتے ٹی ودکی، پیٹرولیم مصنوعات آتا فنانسنگ ءِ پین ودفنگ نا گمان پٹنگ ، پاکستان و اونا الس نا فائدہ ٹی زرگزرانی پنجر نا اصلاحات کن کمک ءِ برجاتخنگ اوار ئسک۔ پاکستان پبی  مخ تفی و کمک ءِ برجاتخنگ آ سعودی عرب ءِ زبردست خراج تحسین پیش کرے۔ ہڑتوم آ کنڈآک ہڑتوم آ ملک آتا نیام اٹ زرکاررانہ کمکاری ءِ پین زیات کننگ، شریداری ٹی ودکی و ہڑتوم آ ملک آتا نجی بشخ آتا نیام اٹ اواری اٹ زرکاری کننگ نا گمان آتے ودفنگ آ امنا کریر۔ ہڑتوم آ ملک آتا نیام اٹ زرکاری نا چاگڑد اس تیار کننگ و تین پہ تینی است خواہی نا زرکاری نا چندی بشخ آتیٹی اسیجائی کوشست  کننگ آہم امنا کننگا۔ اعلامیہ ٹی پاننگانے کہ ہڑتوم آ کنڈآک ہڑتوم آ ملک آتا سرکڑدہ غاتا بصیر ت ءِ مون آ تخسا تینا سٹریٹجک مفاد اٹی صنعت و کانڑکنی نا بشخ آتیٹی کمکاری ءِ ودفنگ و سوگو کننگ نا اہمیت آ زور شاغار ہرانا مسخت ہڑتوم آ ملک آتا نیام اٹ کمکاری ٹی ودکی کننگ ءِ۔ ہڑ توم آک ستاءِ کریر کہ ہڑتوم آ ملک آتا زرکارخور و کشت وکشار نا صنعت آتیٹی اواری اٹی شریداری کننگ ءُ۔ ہڑتوم آ ک سعودی عرب نا وژن 2030 نا رداٹ اکنامک ٹرانسفارمیشن پروگرام تا کمک اٹ ہڑتوم آ ملک آتا نیام اٹ دوئی گمان تا بابت کمکاری و چندی بشخ آتیٹی پنی آ پاکستانی چاہندار آتا آزموندہ و لائخی تیان فائدہ ہرفنگ نا اہمیت آ زور شاغار تانکہ ہڑتوم آ ملک آتا زرگزران تے تین پہ تینی وڑاٹ فائدہ رسینگے۔ اعلامیہ ٹی پاننگاکہ ہڑتوم آ ک میڈیا کوآپریشن اٹی ودکی، ریڈیو، ٹیلی ویژن و نیوز ایجنسی تا بشخ آتیٹی کمکاری ءِ ودفنگ آن بیدس دا رداٹ آزموندہ غاتا ہل و تس آ امنا کریر تانکہ اسیجائی بنداو تیا میڈیا ءِ ٹہیفنگے۔ دورہ نا ایسر آ وزیراعظم پاکستان خادم الحرمین الشریفین شاہ سلمان بن عبدالعزیز آل سعود ، ولی عہد  وڈپٹی وزیراعظم شہزادہ محمد بن سلمان عبدالعزیز آل سعود آن بیدس سعودی عرب نا حکومت نا تینا و تینا ڈل انا گرم جوشی و است انا حب اٹ مہمانداری آ منت واری ءِ ہرفے۔ ولی عہد و نائب وزیراعظم شہزادہ محمد بن سلمان بن عبدالعزیز وزیراعظم پاکستان و برادر ملک پاکستان نا الس نا پین شونداری و شونہالی کن نیک است خواہی و خیرسگالی نا پرجوش جوزہ غاتا درشانی ءِ کریر۔