صدر مملکت عارف علوی شہید ذوالفقار علی بھٹومیڈیکل یونیورسٹی نا وائس چانسلر نا کنڈآن ڈاکٹر ہمایوں اقبال نا سزا نا برخلاف درخواست ءِ مسترد کرے

اسلام آباد۔ 01 مئی (اے پی پی) صدر مملکت ڈاکٹر عارف علوی شہید ذوالفقار علی بھٹو میڈیکل یونیورسٹی نا وائس چانسلر نا کنڈآن ڈاکٹر ہمایوں اقبال ءِ مقام کار آ ٹرینی گریجویٹ ءِ زیزاریفنگ آ دوبہ دار نا کنڈآن بنجائی محتسب نا اول سر آن انکوائری نا پرمان تے کالعدم گوندنگ نا درخواست ءِ مسترد کرے وخت اس کہ صدر مملک تپارے کہ بھاز کم زالبول زیزاریفنگ نا غاوتے مون آ اتیرہ  انتئے کہ زالبول آتے دوبہ ءِ پک کننگ اٹ مشکل آتون مون تروئی تمک۔ یک شنبے نادے آ ایوان صدر پریس ونگ آن جاری بیان نا رداٹ صدر مملکت شہید ذوالفقار علی بھٹو میڈیکل یونیورسٹی ، اسلام آباد نا سنڈیکیٹ و انسداد ہراسیت کمیٹی نا کنڈآن دوبہ دار نا نوکری آن برطرفی نا سزا  ءِ برقرار تخا، صدر عارف علوی دوبہ دار نا برخلاف اول سرآن انکوائری نا پرمان تے کالعدم گوندنگ نا درخواست  ءِ مسترد کرے، دوبہ دار کاریم نا جاگہ غا زالبول آتا انسداد ہراسیت نا بنجائی محتسب نا اول سرآن انکوائری نا فیصلہ نا برخلاف صدر مملکت آن اپیل کریسس، غاو تروک، گریجویٹ ٹرینی، شہید ذوالفقار علی بھٹو میڈیکل یونیورسٹی، اسلام آباد نا وائس چانسلر ءِ دوبہ دار نا برخلاف زیزاریفنگ نا غاو تسوسس، وائس چانسلر باندات ءِ یونیورسٹی نا انسداد ہراسیت کمیٹی ءِ گدریفیسس، کمیٹی 2018 ٹی دوبہ دار آ ملازمت آن برطرفی نا سزا ءِ بیٹ کریسس، یونیورسٹی نا سنڈیکیٹ کمیٹی نا سلاہ و سوج آتے منظور کرسا دوبہ دار ءِ ملازمت آن اینک کریسس، دوبہ دار سزا نا برخلاف انسداد ہراسیت محتسب ءِ اپیل دائر کریسس، محتسب انسداد ہراسیت کمیٹی نا سلاہ و سوج آتے مسترد کرسا فریق آتے بِننگ و شاہدی پیش کننگ نا وموقع فراوان کننگ کن کیس انا اول سر آن انکوائری نا پرمان کریسس، دوبہ دار و غاو تروک ہڑتوم آک محتسب نا فیصلہ نا برخلاف صدر مملکت ءِ درخواست آتے دائری کریسر، دوبہ دار تینا برخلاف اول سرآن انکوائری کننگ نا حد اسکان محتسب نا پرمان ءِ مسترد کننگ نا درخواست کریسس، غاوتروک انسداد ہراسیت کمیٹی نا سلاہ و سوج آتے برقرار تخنگ نا درخواست کریسس، دوبہ دار نا مسکوہی طرز عمل ڈیک ءِ کہ اومستین اٹ زالبول آتے ہراسیت نا شست کرے، دوبہ دار ءِ ہراسیت نا دوبہ غاتیا برطانیہ ٹی رجسٹرڈ ڈاکٹر نا عہدہ غان اینک   کننگا۔ راولپنڈی انسٹی ٹیوٹ آف کارڈیا لوجی ہم دوبہ دار ءِ ہراسیت نا دوبہ غاتیا ملازمت آن کشاسس۔ صدر مملکت پارے کہ سروس نا برطرفی نا انکوائری کمیٹی نا فیصلہ مناسب ئسک ہرادے یونیورسٹی نا سنڈیکیٹ ہم برقرار تخا۔ صدر مملکت انکوائری کمیٹی نا سلاہ و سوج آتے برقرار تخسا دوبہ دار نا درخواست ءِ خارج کرے، صدر مملکت نا دوبہ دار ءِ نوکری آن کشنگ نا یونیورسٹی نا سنڈیکیٹ نا پرمان تے برقرار تخنگ نا پرمان کرے۔