کوئٹہ۔ 01 مئی (اے پی پی) وزیراعلیٰ بلوچستان میر عبدالقدوس بزنجو پارینے کہ یکم مئی نا دے 1886 نا شکاگو نا شہید آتا کوشست و جہد ءِ خراج عقیدت پیش کننگ نادے ءِ دادے ءِ اڈتننگ نا مسخت مزور آتیکن حق انا توار ءِ بڑز کننگ ءِ۔ یوم مزور نا بابت جاری اسہ بیان اسے ٹی وزیراعلیٰ میر عبدالقدوس بزنجو پارے کہ مزور ہر راج و ملک انا جم زرگزرانی و اقتصادی شونداری ٹی اہم ءُ حیثیت اس تخک۔ ہرا ملک آک صنعت نا پڑاٹ خاطر خواہ شون ہلک داٹی اونا مزور آتا تعمیری کڑدءِ یقینا گوجالنگ مفک۔ ننے ہم کسبکار ہیومن ریسورس و پبی افرادی قوت شونداری نا کنڈآ دیک۔ ہرا مزور فنی مہارت اسے آن آشنا مریک او راج انا شونداری و شونہالی نا جزو لازم مریک۔ ساڑی صوبائی حکومت مزور آتا حق انا گچین ادائیگی ٹی کوشست کننگ ءِ۔ میر عبدالقدوس بزنجو پارے کہ صوبائی حکومت خواری کش آتا استحصال کروک آتے اوفتا سزاایتک۔ حکومت غٹ خواری کش آتیکن اسہ وڑ وارخواہی و گرج آتا فراوانی ءِ پک کیک۔ رنگ و نسل ءِ بنداو جوڑ کرسا پرخ انا اسُل موکل تفننگک۔ حکومت تکنیکی تعلیم نا اہمیت آن ہم بلد ءِ۔ وزیراعلیٰ پارے کہ مچ آ صوبہ نا پولی ٹیکنیک ادارہ غاتے پوسکن آ وڑتتون ہم گرنچ کننگ انگ ءِ۔ پوسکن آ دنیا نا خواست آتے مون آ تخسا ورناتے بڑزکو فنی مہارت آن آشنا کرسا اوفتا لائخی تے پین مون آدننگک۔
