پاکستان سعودی عرب ءِ گوما تاریخی یکوئی ءُ جھلانکیں سریٹجک شریکدار ءِ تہ ءَ مٹ بوھگ ءِ واھشت مند انت، مزن وزیر شہباز شریف ءِ عرب نیوز ءَ را انٹرویو

جدہ۔ 29اپریل (اے پی پی): مزن  وزیر شہباز شریف ءَ گوشت کہ پاکستان سعودی عرب ءِ گوما وتی تاریخی یکوئی آناں گیش شاھیگان کنگ ءُ سٹریٹجک شریکدار ءِ تہ ءَ مٹ کنگ ءِ  واھشت ایگ انت، دوئیں ملک اقتصادی ،  تجارتی ءُ سرمایہ کاری  رابطہ آنی دیمروئی ءِ واستہ  گیر روایتی شوبگ آنی سر ءَ کار کنگ ءَ انت، پاکستان ءَ روس ءُ یوکرین ءِ گوما  جوانیں یکوئی است،  گیش منوگری  ، میاں اوستمانی کانود ءُ یونائیٹڈ نیشن ءِ چارٹر ءِ رد ءَ  کشاں چیل آنی سفارتی گیوری المی انت۔ آئی ءَ اے ھیالانی درشانی  عرب نیوز ءَ را یک داتگیں انٹرویو ءِ تہ ءَ کت انت۔  مزن وزیر  ءَ گوشت کہ دوئیں ملک آنی نیام ءَ  ھاسیں  یکوئی  ھپتاد سالی انت۔ مئے گیشاں چہ گیش واھشت انت کہ ما اے یکوئی آناں  جھلانکیں،  پزوریں  ءُ وت مہ وتی رنگ ءَ سیت مند سٹریٹجک شریکداری ءِ  تہ  ءَ مٹ بکن آں۔ آئی ءَ  گوشت کہ اے سعودی عرب ءِ اولی گیر ملکی تر ءُ تاب  ءَ چہ اے گپ  ءِ درشان بیت کہ پاکستان سعودی  عرب ءِ گوما وتی ھاسیں یکوئی آناں ارزشت دنت انت۔ مزن وزیر ءَ گوشت کہ ٹوھیں منوگری، میاں اوستمانی کانود  ءُ یونائیٹڈ نیشن ءِ چارٹر ءِ رد ءَ کشاں چیل آنی سفارتی گیواری المی انت۔ پاکستان  آماچیں دمگ آنی شہری آناں  بنی آدم دوستی بنیات ءَ کمک پجاری کنگ ءِ  توامیں کوشست آنی کمک ءَ کنت۔  آئی ءَ گوشت کہ پاکستان ءَ یوکرین ءِ مردم آناں  بنی آدم دوستی رد  ءَ  کمکی سامان ءِ پجاری ءِ واستہ  دو سی ون تھرٹی بالی گراب روان داتگ ءُ یکوئی  ءِ جوزگ  ءِ رنگ ءَ گیش سامان روان دیگ ءِ ھوالگ ءَ  چار ءُ بچار کنگ ءَ انت۔  آئی ءَ گوشت کہ کشاں چیل ھاسیں رنگ ءَ  نوک دیمروئیکنوکیں ملک آنی سیت ءَ شر نہ انت۔